PhilHealth nilibkas sa 45-day Benefit Limit Rule

CEBU, Philippines — Gilibkas sa Philippine Health Insurance Corporation (PhilHealth) ang 45-day Benefit Limit Rule aron masiguro ang walay hunong nga pag-access sa healthcare alang sa mga Pilipino ilabi na kadtong adunay long-term nga panginahanglanon sa medical.

Ang 45-day Benefit Limit Rule usa ka lagda sa PhilHealth nga naghatag sa mga miyembro og labing taas 45 ka adlaw nga pagpaospital matag tuig ug ang ilang mga kwalipikadong mga dependent magbahin sa labing taas nga 45 ka adlaw matag tuig.

Matud ni Acting President ug CEO Dr. Edwin Mercado nga kini nga limit usa ka outdated cost-containment strategy nga nagkinahanglan og reporma tungod sa kausaban sa mekanismo sa pagbayad.

Iyang gihatagan og gibug-aton nga ang medikal nga panginahanglanon dili matagna ug daghang mga kondisyon o sakit ang nagkinahanglan og labaw pa sa 45 ka adlaw.

Ang PhilHealth Circular No. 2025-007 nga gipirmahan ni Mercado nagtangtang sa 45-day Benefit Limit Rule alang sa claims payment sugod sa Abril 4, 2025 nga naglangkub sa tanang kondisyong medikal, surgical procedures ug special packages ubos sa All Case Rates payment mechanism alang sa mga pasyente sa accredited health facilities.

Matud ni Mercado nga ang pagtangtang sa 45 ka adlaw nga limit mas makapagaan sa gastohan sa mga pasyente nga adunay chronic illnesses o magdugay sa ospital.

Apan gipahinumduman sa PhilHealth ang mga miyembro nga ang pag-angkon sa mga benepisyo kinahanglang ibase sa saktong medical indication, panginahanglan ug subay sa treatment plan sa pasyente ug kinahanglang mosunod sa widely-accepted nga sumbanan sa pag-atiman, mga Clinical Practice Guidelines (CPGs) nga giaprobahan sa Department of Health (DOH) o PhilHealth Circulars sa kalidad nga mga sumbanan. Aron masiguro ang responsableng pagpatuman hugot nga bantayan sa PhilHealth ang mga admission, readmissions ug paggamit sa benepisyo lapas sa 45 ka adlaw aron malikayan ang sayop nga paggamit ug masiguro nga ang reporma makabenepisyo niadtong tinuod nga nanginahanglan niini.

Subay niini, ang mga ospital kinahanglang mosunod sa clinical standards ug reimbursement rules nga gi-assess pinaagi sa Health Care Providers Performance Assessment System (HCPPAS). Giawhag usab sila sa pagsagop sa mga palisiya nga makapauswag sa kalidad sa serbisyo ug patient outcomes. BDB BANAT NEWS