Bugas nga gipanghatag sa Duljo Fatima dili gikan sa calamity fund

CEBU, Philippines — Gihimakak sa pangulo sa Department of Social Welfare and Services (DSWS) nga ang pundo alang sa pag-apod-apod sa sinakong bugas sa Duljo Fatima, nga bag-o lang gikuwestiyon sa konseho, gi charge ngadto sa calamity fund.

Si Portia Basmayor, ang pangulo sa DSWS nitug-an nga sukwahi sa gipasangil sa konseho, ang mga sako sa bugas alang sa mga indigents, ug ang pundo niini gigahin na ubos sa DSWS.

Ang Cebu City Council mitawag sa executive department, partikular na sa Local Disaster Risk Reduction and Management Fund (LDRRMF) Relief and Recovery, labot sa giingong pag-apod-apod sa bugas nga giingong gigamit sa "kampanya".

Matud ni Basmayor, existing na kini nga programa ubos sa buhatan sa mayor, hinuon siya miingon nga ang Relief and Recovery sa LDRRMF dili nagpasabot nga magamit lamang sa natad sa kalamidad kondili sa social preparedness usab.

Dugang pa niya nga ang pag-apod-apod sa mga bisan unsa nga hinabang sa dakbayan sa Sugbo dili kinahanglan nga kuhaon sa calamity fund, kon dili mamahimo sab nga kuhaon sa Indigent program ubos sa account sa DSWS.

Ang mga pangutana bahin niini naggumikan sa privilege speech ni Konsehal Mary Ann de los Santos, kinsa nisaway usab sa "undignified" nga paagi sa pag-apod-apod, diin ang mga sako sa bugas gidiskarga sama sa mga balas.

Dugang gibutyag ni De los Santos nga ang P49 milyones gikuha ngadto sa Relief and Recovery fund sa LDRRMF, diin iyang namatikdan nga gigamit bisan pa walay deklarasyon sa state of calamity. (BANAT NEWS)