Mga magtutudlo nga moserbisyo sa eleksyon duna nay igong katakus  

CEBU, Philippines — Gipaneguro sa Commission on Election nga bansay na ang katakos sa mga magtutudlo nga magsilbing Electoral Board ning nagsingabot nga eleksyon.

Gipaubos ang mga magtutudlo sa practical exam ubos sa Department of Science and Technology aron maseguro nga mahimo nila ang ilang trabaho ilabi na may kalabutan sa technical aspect sa umaabot nga piniliay.

Atol sa katapusang adlaw sa pagbansay-bansay sa mga moserbisyo isip electoral board gipaneguro sa COMELEC nga andam sila sa ilang responsibilidad sa umaabot nga Mayo 2025 Midterm Election sama sa mga participants nga niapil sa training kagahapon sulod sa usa sa mga hotel sa dakbayan.

Matud pa ni Atty. Francisco Pobe, ang Rehiyonal nga Director sa COMELEC 7 nga dili lang theoritical ang ilang gitutukan kon dili apil na ang practical nga paghandle sa mga kahimanan nga gamiton sa umaabot nga piniliay.

Sumala pa ni Pobe ang pagpahigayon sa Practical Examination gihimo kini sa DOST.

Ang mga magtutudlo makadawat na unya daan sa katunga sa ilang honorarium sa dili pa ang eleksyon ug ang katunga inig kahuman na sa piniliay kini maoy gipaneguro sa kadagkuan sa COMELEC.

Samtang gipaubos usab og training ang 604 ka mga magtutudlo sa siyudad sa Lapu-Lapu nga moserbisyo nga sakop sa electoral board sa Mayo 12 nga eleksyon.

Nagsugod ang ilang training niadtong Marso 17 hangtud kini sa Marso 31, 2025.                                                                                      

Suma pa ni election officer Atty Ann Janette Lamban nga ang 604 Electoral Board members ang pagalangkoban sa chairmen ug poll clerks nga idistino ngadto sa 302 ka clustered precincts. Si Lamban miingon nga mahinungdanon kaayo nga nabansay na daan ang mga magtutudlo sa paggamit sa Election Counting Machine (ECM) aron pagsiguro nga kalikayan ang mga kakulian.                                                                                                                                       

Hinuon sa mga kasayuran nga iyang nahipos sa DOST iyang nasuta nga ang mga magtutudlo adunay igong kabangkaagan sa paggamit sa ECM. (BANAT NEWS)