Sisterhood sa Kumamoto, Japan ug Talisay gipaabot nga maumol

CEBU, Philippines — Mibisita sa Dakbayan sa Talisay ang mayor sa lungsod sa Mifune nga si Masayuki Fujiki sa Kumamoto, Japan ug nipadayag sa intensyon nga mosulod og kasabutan.

Si Talisay City mayor Gerald Anthony “Samsam” Gullas ug ang iyang konseho miabi-abi sa grupo ni Fujiki ug mipaila sa kanindot sa ilang lungsod uban ang oportunidad nga mahimong mapahimuslan sa Talisaynon.

Nagtuo ang mga hapon sa kapabilidad sa pinoy nga magtutudlo ug nipadayag sa intensyon nga sila mosulod og sisterhood city.

Si konsehal Eduardo “Digul” Gullas III, chairman sa committee on education nibutyag nga dako kini og kahigayonan nga makapadala kita og english teachers ngadto sa Japan nga di na magkalisod sa pag apply og Visa.

Ang posible nga ipadala kadtong mga tinun-an sa Talisay City College (TCC) nga maoy maapil unya sa Memorandum of Agreement (MOA).

Nagkanayon si Gullas nga dili lang mga magtutudlo sa pinulongan nga English ang ipadala kundi lakip nasab ang uban pa nga trabaho nga gikinahanglan sa lungsod sa Mifune sa Japan.

Ang ordinansa nga sister city gipangamahanan ni Gullas nga giaprobahan usab sa konseho sa ikatulo ug katapusan nga pagbasa.

Dugang pa ni Gullas nga posible pa nga mohatag og dugang ayuda ang Mifune, Japan sama sa proyekto sa imprastraktura.

Gipaabot nila ang paghimo sa kasabutan aron mahingpit na ang sisterhood sa Talisay ug sa Mifune, Japan. (BANAT NEWS)