Namuyo sa tipolo residences midawat og ayuda sa DOLE

CEBU, Philippines — Mokabat sa P672,999 ang gihatag sa Department of Labor and Employment (Dole) ngadto sa Tipolo Residences Informal Workers Association (TRIWA) aron pagsuporta kanila sa himoon nilang general merchandise business sa Tipolo Residences 1 sa Barangay Tipolo sa siyudad sa Mandaue.                                                                                                                                        

Kini maoy resulta sa paningkamot nga makabaton og kapanginabuhian ang mga nagpuyo sa Tipolo Residences Building nga gitukod sa kagamhanan sa maong dakbayan. 

Ang mga benepisaryo niini ang 52 ka informal settlers nga modumala sa tukoron nilang negosyo sulod sa maong building.

Apil na niini ang usa ka grocery store nga mobaligya sa mga kinahanglanon sa panimalay sama sa bugas, canned goods, noodles ug uban pa.                                                                                                                                                  

Ang Dole maoy naghatag kanila og puhonan sa patigayon nga ilang pagadumalahon nga ang mga kustomer sila lamang usab nga mga nagpuyo sa Tipolo Residences.                                                                                                                                                                                  Si Marina Pam-ot nga maoy presidente sa Tipolo Residences miingon nga magtinabangay sila nga molambo ang maong patigayon diin sila lamang usab ang makapahimulos sanglit magsilbi na man kini nilang livelihood.                                                                                                                                     

Sa nasayran ang ground floor sa Tipolo Residences 1 maoy kapahimutangan sa mga nagtinguha sa pagnegosyo apan mag-abang kini sa maong building sa kantidad nga P1,500 ang matag bulan.                                                                                                                                 

Hinuon si Pam-ot miingon nga gihatagan sila og tulo ka bulan nga libre sa ilang pag-abang sa paghatag kanila og kahigayonan nga makasukad ang ilang tukoron nga negosyo.Sa nasayran ang Building 1 ang kasamtangang gipuy-an sa 104 ka pamilya ug ang Building 2 ang gipuy-an usab sa 90 ka pamilya.

Ang maong mga pamilya mao ang kanhi mga biktima sa sunog sa milabay nga katuigan ug ang Tipolo Residences Building mao na ang nagsilbi nilang permanenteng pinuy-anan nga gipatukod ni kanhi Mayor Jonas Cortes. (BANAT NEWS)