Daanbantayan nagpabiling walay klase karong adlawa

CEBU, Philippines — Nagpabilin nga walay klase karong adlawa, Marso 21, 2025 sa Lungsod sa Daanbantayan gumikan sa dili maayong panahon.

Kagahapon si Mayor Sun Shimura nisuspenso sa klase sa tanang lebel sa ilang lungsod tungod sa nasinati nga pag-ulan-ulan o dili maayong lakat sa panahon.

Subay niini, 11 ka lungsod ug siyudad sa Probinsiya sa Sugbo ang nisuspenso sa klase apil niini ang mga lungsod sa Santa Fe, Pilar, Madridejos, Bantayan, San Remigio, Poro, Tabuelan, Tuburan, Daaanbantayan ug mga siyudad sa Danao ug Talisay.

Sa Dakbayan sa Talisay gikansela ang klase sa mga pampublikong tunghaan samtang ang mga pribadong eskwelahan ug ang Talisay City College nagdepende na kini sa school heads ang pagkansela sa ilang mga klase.

Ang Provincial Disaster Risk Reduction and Management Office (PDRRMO) naka-standby ug padayon nga nag-monitor sa kalungsuran ug siyudad.

Base sa alas 5:00 sa hapon kagahapon nga heavy rainfall warning advisory sa PAGASA Central Visayas ang mga lungsod sa San Francisco, Poro, Tudela, Pilar, Bantayan, Madridejos, Santa Fe, Daanbantayan, Medellin, San Remigio ug Siyudad sa Bogo, ubos sa yellow warning.

Pasabot nga possibleng adunay pagbaha sa low-lying areas ug pagdahili sa yuta sa mga bukirang bahin gumikan sa kanunay nga pag-ulan.

Samtang ang mga lungsod sa Tabogon, Borbon, Tabuelan, Tuburan, Sogod, Catmon, Carmen, Asturias ug Dakbayan sa Danao makasinati og hinay ngadto sa kasarangan ug adunay talagsang kusog nga pag-ulan tungod sa shear line. — Gabriel C. Bonjoc, Gie-Ann N. Tapic (BANAT NEWS)