De Los Santos nikwestiyon sa pagpang-apod-apod sa bugas

CEBU, Philippines — Gikwestiyon karon ni Konsehal Mary Anne De Los Santos ang nahitabong pagpang-apod-apod og sinako nga bugas sa Barangay Duljo Fatima niadtong Marso 11, 2025 nga giingong nakadawat kini og hinabang gikan sa kagamhanan sa Dakbayan sa Sugbo bisan og wala kini gipaubos og state of calamity.

Nabalaka ang konsehal human nga niabot sa iyang buhatan ang usa ka video nga nikatap diha sa social media sa pamaagi sa distribution sa sinako nga tag lima ka kilo nga bugas nga sa og gibubo nga bunbon ug graba sa yuta gikan sa truck nga iya sa Department of General Services.

“The manner of distribution as shown in the video of the activity was highly undignified and inconsistent with our standards for respectful and efficient public service”, matud ni De Los Santos atol sa iyang privilege speech.

Makita usab sa maong video nga adunay usa ka lalaki nga nang-apod-apod sa maong sinako nga bugas apan nagpabiling kwestiyonable kong nahatag ba gyud sa beneficiary.

Ug giingong adunay duha ka personnel nga nagsul-ob og uniporme nga nag-supervise sa maong distribution diin posibleng mga kwani sa gobiyerno ug pipila ka mga tawo nga nagsul-ob sa mga t-shirt nga anaa ang pangalan ni Mayor Raymond Alvin Garcia.

Ug makita sa maong video nga wala nagkadimao ang distribution sa LDRRMO ug BDRRMC sa Barangay Duljo Fatima.

Nasayran ni De Los Santos nga ang gipang-apod-apod nga mga bugas lakip kini sa 166,600 nga sako sa bugas gikan sa A1 Milling Corporation nga nagkantidad ngadto sa P49,896,700 nga ubos sa account sa Local Disaster Risk Reduction and Management Relief and Recovery.

Matud ni ni De Los Santos nga niadtong Marso 27, 2024 pa ang ulahing resolusyon nga giluwatan sa Cebu City Local Disaster Risk Reduction and Management Office nga nagdeklara og state of emergency sa 28 ka bukirang barangay sa siyudad tungod sa grabeng epekto sa El Niño ug gani wala usab malakip sa maong lista ang Duljo Fatima.

Ug gumikan kay walay apil ang maong barangay sa state of calamity o state of emergency gi-awhag ni De Los Santos ang Cebu City Local Disaster Risk Reduction and Management Council nga mosumite og pormal ug detalyado nga report sa legal nga basehanan sa paggamit sa LDRRMF nga pundo alang sa distribution sa bugas sa maong barangay.

Lakip usab sa ipasumite sa konsehal ang tibuok listahan sa beneficiaries. (BANAT NEWS)