Wing van nibangga sa center island, drayber nasibat    

CEBU, Philippines — Usa ka drayber sa wing van truck nga nagkarga og kamay nga gituohang wala sa iyang hustong panghuna-huna ang nibangga sa center island nga gitukod diha sa Cebu South Coastal Road sa Barangay San Isidro kagahapon sa kadlawon.

Human sa aksidente giingong dali nga nisibat ang maong drayber kinsa nakaangkon og mga garas sa lawas apan nasikop dayon kini atol sa gipahigayon nga hot pursuit operation matud ni Jonathan Tumulak, pangulo sa City of Talisay-Traffic Operation Development and Authority.           

Ang drayber giila nga si alyas “James”, 36-anyos, taga Poblacion, San Jose, Negros Oriental ug gidudahan sa mga sakop sa CT-TODA nga wala sa hustong panghuna-huna ug kondisyon sa iyang lawas.

Ang maong insidente nakamugna og kahuot sa dagan sa trapiko tungod kay usa lang ka lane ang maagian padulong sa habagatan.

Human sa maong hitabo ang CT-TODA nipahibalo dayon sa tag-iya sa maong truck kinsa nakabase sa Dumaguete City.

Matud ni Tumulak nga ang maong truck adunay karga nga napulo ka tonelada nga gibug-aton sa kamay.

Ang truck udto na nga napadaplin ug nahibalik na usab sa normal ang dagan sa mga sakyanan. (BANAT NEWS)