Oslob nibalik sa rate sa whale shark watching ug diving
CEBU, Philippines — Alang sa mga turista nga gustong mosuroy ug mosuway sa whale shark watching sa Lungsod sa Oslob, ang lokal nga kagamhanan pinaagi sa Municipal Tourism Office niini nianunsyo sa mga rate sa kalihokan.
Sa mga gustong motan-aw o mag whale shark watching gibalik sa P500 matag turista ang bayad sa mga lokal (Filpino) nga bisita samtang sa mga langyaw, P1,000 ang bayad.
Gibalik sa LGU ang original rates subay sa nakalatid sa Municipal Ordinance No. 010 series of 2020.
Base sa post diha sa social media page sa Municipality of Oslob - Tourism Office niadtong Marso 13, 2025 ang maong rate epektibo sugod sa Marso 21 karong tuiga.
Samtang sa mga gusto nga mag-scuba diving aron mas duol ang inter-action sa whale shark ang rate sa mga turista nga langyaw anaa sa P1,500 samtang sa mga lokal (Filpino) nga bisita P1,000.
Ang maong rate magsugod usab ugmang adlawa matud sa LGU.
Ang tourism office sa Oslob niawhag sa mga bisita nga mo contact sa ilang buhatan pinaagi sa social media kon ugaling adunay mga klarohan nga gustong ipadangat kalabot sa gihimong anunsiyo sa LGU. (BANAT NEWS)
- Latest
