HVI nga menor de edad na-rescue sa kapolisan

CEBU, Philippines — Na-rescue sa Mambaling Police Station sa Cebu City Police Office ang usa ka 15-anyos nga bayong-bayong nga giingong high value individual atol sa ilang buy-bust diha sa Sitio Puntod, Barangay Mambaling, Siyudad sa Sugbo niadtong Martes sa gabii.

Ang na-rescue mao si alyas “Coco”, grade 8 student, nagpuyo sa Sitio Naba Alaska, Barangay Mambaling niining siyudad.

Nakuha sa kapolisan gikan sa maong menor ang 50 gramo nga shabu nga nagkantidad tanan ngadto sa P340,000.

Matud ni Police Lieutenant Colonel Maria Theresa Macatangay, deputy city director for operations ug tigpamaba sa CCPO nga makapabalaka ang pag-rescue sa bata tungod sa transaksiyon nga gihimo niini nga makonsidera sa kapolisan ang menor sa ilang categorization nga HVI. Ang proseso nga gisunod karon sa kapolisan mao nga nagpaabot sila sa certificate of discernment nga iisyu aron makasang-at og tukmang kaso.

Apil usab sa imbestigasyon sa kapolisan kon kinsa ang tinubdan sa maong menor de sa ilegal nga drugas ug asa kini padulong.

Samtang ang mga operatiba sa Sawang Calero Police Statio nagpahigayon usab og buy-bust operation sa Sitio Omega, Barangay Sawang Calero niadtong Martes sa gabi.

Nadakpan nila sila si alyas “Manoy”, 49-anyos, nagpuyo sa Sitio Sto. Niño, Barangay Inayawan, us aka HVI ug alyas “Kim”, 32, residente sa Camilla Homes, Barangay Lawaan 1, Dakbayan sa Talisay.

Nakuhaan ang mga suspetsado og 120.15 gramo nga shabu nga nagkantidad og P817,020.

Sa laing bahin, natanggong sa Presinto 2  sa Mandaue City Police Office  (MCPO) sa Subangdaku Police Station ang pito ka motorista nga nadakpan human sila nasakmiti  pakete sa  shabu atoll sa Comelec checkpoint nga ilang gihimo  diha sa dalan Logarta kagahapon sa kadlawon. Si Police Major Jade Sumogat, hepe sa Preinto 2  ang nangulo sa maong  checkpoint.

Ang maong mga suspetsado gikan sa Siyudad saa Sugbo diin padulon na unta silang mamauli sa  ilaha sa Lungsod sa Consolacion, Siyudad sa Mandaue  ug Siyudad sa Lapu-Lapu. Romeo D. Marantal, Romeo T. Limpangog (BANAT NEWS)