Buhisan Elementary School posibleng ibalhin   

CEBU, Philippines — Nag-agad ang mga magtutudlo sa hukom sa principal sa Buhisan Elementary School ug Buhisan Night School pagpatuman sa modular classes alang sa mga tinun-an sa mga mosunod nga buwan human nga niluwat og resolusyon ang Cebu City Disaster Risk Reduction and Management Council nga nagdeklarar nga ipaubos na ngadto sa state of emergency ang maong tunghaan tungod sa mga dagkong liki nga nakita sa tulo ka andana nga classrooms ug sa mga buhatan.

Gawas sa mga dagkong liki nga nakita sa sawog, hagdanan, ug mga bongbong, gikonsidera usab ang maong pamaagi sa pagtudlo tungod kay dili na usab kini luwas kong mag-uwan o kong adunay laing katalagman nga mahitabo.

Nasayran nga kapin sa 1,000 ka tinu-an, magtutudlo ug mga non-teaching personnel ang apektado sa maong pagpangliki.

Ang Office of the Building Official, Mines and Geosciences Bureau-7, ug Department of Engineering and Public Works nirekomendar nga kinahanglang i-relocate una ngadto sa mas luwas nga lugar ang pagpadayon sa pagpahigayon og klase aron makalikay sa peligro ang mga tinun-an ug magtutudlo.

Matud ni Mayor Raymond Alvin Garcia nga gitan-aw na karon sa kagamhanan sa siyudad ang pagpalit og luna diha sa likod sa Buhisan Barangay Hall nga posibleng mahimong relocation site sa maong tunghaan apan dili siya kapasalig nga matukoran dayon kini og bag-ong building.

Ang maong luna aduna kini gidak-on nga 2,000 ngadto sa 4,000 square meters apan usa kini ka pribadong luna. Sa pagkakaron, ang temporaryo nga intervention nga nakita ni Garcia mao ang pag-retrofit sa kasamtangan nga mga building. Nipasalig usab ang DEPW nga ipatuman ang mga intervention sa mas dali nga panahon sa dili pa magsugod ang ting-uwan. (BANAT NEWS)