Ex-convict gipusil patay

CEBU, Philippines — Patay ang usa ka 45-anyos nga lalake nga ex-convict human kini gipusil sa mga lalaking nagmotorsiklo diha sa Sabellano Street, Barangay Poblacion Pardo, Dakbayan sa Sugbo kagahapon sa hapon.

Ang biktima mao si Rudgie Dela Peña,  nagpuyo sa Lungsod sa Minglanilla.  Matod pa ang biktima nagtambay sa naasoy nga lugar dihang kalit lang kini gipauwanan og bala sa mga mamumuno nga miresulta sa hinanaling kamatayon niini.

Na-recover sa crime scene ang 12 ka basiyo sa bala sa kalibre .45 nga armas ingon man usa ka medium size nga putos sa gituohang shabu.

Ang 26-anyos nga anak sa biktima miangkon nga ang iyang amahan napriso og lima ka tuig tungod sa kalambigitan niini sa illegal nga drugas.

Nakagawas matud pa ang iyahang amahan duha ka tuig ang nakabalay apan wala na siya masayod pa kun niundang ba kini sa iyahang illegal nga kalihukan.

Mag-adtuan matod pa ang iyahang amahan sa Barangay Poblacion Pardo kay didto kini nagdako ug gipahibawo nalang siya sa amigo sa iyahang amahan mahitungod sa nahitabo.

Panawagan sa anak sa kapulisan nga masayran kun kinsa ang nagpusil patay sa iyang amahan.  Padayon sab ang imbestigasyon sa kapulisan labot sa maong insidente. Romeo D. Marantal, IBM BANAT NEWS