Kaso sa dengue lukop nasud nisaka–DOH

CEBU, Philippines — Ang Department of Health (DOH) nakatala og kinatibuk-ang 62,313 ka kaso sa dengue lukop nasud gikan sa Enero 1 hangtud sa Marso 1, 2025.

Sa unang duha ka buwan niining tuiga ang kaso sa dengue mas taas og 73 porsyento itandi sa samang panahon niadtong tuig 2024.

Ang tulo ka rehiyon nga adunay pinakadaghang kaso mao ang Calabarzon nga niabot ngadto sa 12,735 ka kaso; National Capital Region nga adunay 11,291 ka kaso ug Central Luzon nga dunay 10,185 ka kaso. Apan ang fatality rate karong tuiga mas ubos sa 0.35 porsyento kompara sa 0.42 porsyento nga natala kaniadtong tuig 2024.

Bisan pa man nga dili labot ang Central Visayas sa mga nag-unang rehiyon nga daghan og kaso sa dengue ang DOH-7 Center for Health Development nagkanayon nga adunay rising trend sa tibuok rehiyon.

Hangtud sa Pebrero 22, 2025 nakatala ang departamento sa panglawas og kinatibuk-ang 3,058 ka kaso o 19 porsyento nga pagtaas kompara sa samang buwan sa niaging tuig nga adunay 2,574 ka kaso.

Gipahinumduman sa DOH ang publiko nga ang mga kaso sa dengue mahimong mosaka sa tibuok nasud panahon sa ting-uwan.

Isip pagpangandam sa ting-uwan kinahanglang hingusgan ang mga paningkamot sa katawhan ug mga lokal nga kagamhanan batok sa dengue pinaagi sa pagguba sa mga breeding grounds ug pagpahigayon og clean-up ug information drives.

Samtang ang ubang protective measures mao ang pagsul-ob og long sleeves ug karsones nga nagtabon sa panit, paggamit sa mga lotion ug spray batok sa lamok.

Giawhag usab ang publiko nga magpakonsulta dayon kon makasinati sa mga simtomas sama sa hilanat, labad sa ulo, sakit sa kaunuran ug lutahan, kasukaon ug rashes.  (BANAT NEWS)