CEBU, Philippines — Balhog sa prisuhan ang usa ka lalaki kay giingong iyahang gipusil ang iyahang uyoan diha sa Sitio Tipolo, Barangay Mabasa, Lungsod sa Argao alas 6 sa gabii niadtong Domingo, Marso 16, 2025.
Ang biktima mao si alyas Dindo, 52, samtang ang suspect mao si alyas Sany, parehong taga Sitio Tipolo, Barangay Mabasa, Lungsod sa Argao.
Sa impormasyon sa Argao Municipal Police Station nakadawat sila og tawag gikan sa Argao Communication Center mahitungod sa nahitabong pagpamusil sa naasoy nga dapit.
Base sa inisyal nga imbestigasyon sa kapulisan ang biktima ug suspek nagkalalis na daan.
Alas- 6 sa gabii niadtong Domingo, ang biktima ug ang witness nga mao ang 12-anyos niya nga anak sa biktima sakay og motorsiklo gikan sa Sitio Sayao nga sakop gihapon sa maong barangay ug padung na kini mouli.
Apan pag-abot sa nahitaboan, ang suspek nipahunong sa biktima ug miingon "gahi ka tiyo" dayong pusil sa biktima sa dughan ug ulo gamit ang kalibre .38 revolver.
Patay diha-diha dayon ang biktima.
"Ang victim ug suspect ang naglalis...Sige’g yaga-yaga ang uyuan sa pag umangkon...unya ug maglalis..ang victim manghagit og pinusilay,"sigon ni Police Major Janus Giangan, hepe sa Argao Police Station.
Nagpahigayon dayon og hot pursuit operation ang kapulisan ug nadakpan ang suspetsado.
Na-recover sa otoridad ang usa ka unit sa .38 revolver, misfired bullet sa chamber ug duha ka empty shells. Kasong homicide ang ipasaka batok sa suspetsado. (BANAT NEWS)