CEBU, Philippines — Ang Cebu City Disaster Risk Reduction and Management Council nipagawas og resolusyon nga nagtinguha nga mahatagan og emergency road access ang Sitio San Miguel, Barangay Apas, human ang mga residente niini niduso og petition letter sa Office of the Mayor aron ipadayag ang ilang kahimtang kalabot sa giingong pagpasira sa ilang access road.
Niadtong Enero 2025, ang mga residente sa Lot 938 A ug B ug Lot 939 sa Purok 6, Sityo San Miguel, Barangay Apas, Cebu City, nipadala og suwat ngadto sa Office of the City Mayor aron mangayo og tabang kalabot sa ilang mga kabalaka.
Matod nila, hingpit nilang giila ug gitahod ang legal nga katungod sa Altarica Development Corporation, ang bag-ong tag-iya sa Lot 933.
Apan, nidangop sila isip mga residente, ug sila midugang, "maapektuhan pag-ayo" sa plano nga sirad-an ang karsada gikan sa main street sa Barangay Apas paingon sa lugar sa mga residente sa Purok 6, nga naglakip sa Lots 938 A ug B, ug Lot 939.
Ilang gisugyot nga, isip usa ka precautionary measures, ang tag-iya sa lote mahimong mag-isyu og sticker gate pass alang mga dunay sakyanan matag panimalay aron masiguro ang pagkontrolar sa mga sakyanan nga mosulod ug mogawas.
Gihatagan nila og gibug-aton nga lisud alang sa mga residente nga makaabot sa main road kung adunay emergency.
Subay niini, nagpahigayon og risk assessment ang CDRRM Office sa maong lugar ug mismo ang mga residente ang nakighinabi niini.
Sa ilang assessment ug evaluation, ang CDRRMO miingon nga ang tag-iya sa lote diin nahimutang ang access road giingong nagplano nga sirad-an ang lugar ug magbutang og gate.
Dugang pa nila nga ang gisugyot nga dalan, nga gihatag sa tag-iya sa yuta aron magsilbing agianan sa higayon nga matukod na ang gate ug sirad-an ang orihinal nga dalan, huot ug dili maagian sa mga emergency vehicle o bisan unsang matang sa sakyanan nga makaagi. Subay niini, ang CDRRMO nirekomendar sa paghatag og Emergency Access Road ug pag-endorso niini ngadto sa Office of the Building Official (OBO) aron ma-verify ang fencing permit.
Ila sab kini gi-endorso ang samang kabalaka ngadto sa City Assessor's Office ug sa City Planning and Development Office alang sa dugang assessment ug evaluation.
Sa samang tigom, gi adopt sa CDRRMC ang risk-assessment report sa disaster team.
Ang samang resolusyon nihangyo usab sa Task Group Reduce Danger Zones (TG-ReDZ), pinaagi sa Flood Mitigation Division niini, nga mohimo og ocular inspection sa hingtungdan nga lugar ug isumite ang resulta sa ilang imbestigasyon ngadto sa CDRRMC.
Sa pamahayag sa mga tigbalita, si Ramil Ayuman, CDRRMC Chairman, niingon nga ilang ihatag ang kopya sa report ngadto sa OBO. (BANAT NEWS)