CEBU, Philippines — Mokabat sa P375,000.00 ang gibiling danyos sa nahitabong sunog sa walo ka mga panimalay sa sitio Buntog, Zone 2, Barangay Canduman sa Siyudad sa Mandaue alas 4:40 ang takna sa hapon niadtong Sabado Marso 15, 2025.
Si Fire Officer 2 Clark Louie Yao, fire investigator sa Mandaue City Fire District Office nga alas 4:45 sa hapon giisa kini sa first alarm ug alas 5:10 hingpit napawong ang kalayo.
Matud pa ni Yao walo ka mga balay ang naugdaw nga pulos ginama sa mga light materials.
Usa ka 17 –anyos nga babaye ang gikatahong naangol tungod napaso kini diha sa iyang bukobuko ug uban pang bahin sa iyang kalawasan nga maoy hinungdan nga gidala kini sa tambalanan.
Matud pa ni Yao nga ang biktima giingong natulog sa sulod sa lawak sa ilang panimalay ug nakamata lang dihang nidilaab na sa kalayo sa ilang balay, maayo nalang nga nakadali kini og gawas.
Si Canduman Barangay Kapitan Dante Borbjajo miingon nga ang City Social Welfare and Services Office (CSWO) nga mga personnel ang padayon na nga naghimo sa ilang pagpanglsta sa mga pamilya nga biktima sa maong sunog .
Nunot niini padayon na usab ang paghatag kanila og hinabang nga naglakip sa ilang pagkaon ug uban pa nilang panginahanglan.
Dugang pa ni Borbajo ang mga biktma temporaryo karong gipahiluna sa Barangay Gym sa Canduman hangtod nga mapatukod na nila og balik ang ilang mga panimalay sa maong dapit.
Padayun pa ang kabomberohan sa ilang imbestigasyon aron sa pagsuta sa hinungdan sa maong sunog. (BANAT NEWS)