Cebu City mohatag og tag P5M nga ayuda sa mga barangay
CEBU, Philippines — Gipahibawo ni Cebu City Mayor Raymond Alvin Garcia nga ihatag na kagamhanan sa Siyudad sa Sugbo ang tag P5 milyones nga financial assistance alang sa 80 ka barangay sa siyudad.
Matud sa mayor nga kadtong mga nakakompleto na sa dokumento ug nahimoan na og tseke i-release na ang P5 milyones nga financial assistance sa matag barangay.
Sa pagkakaron, 20 pa lang ka barangay ang nakita ni Garcia nga nakatuman sa tanang rekisitos.
Karong adlawa gikatakdang ma-finalize kon pila ka barangay ang mahatagan sa maong ayuda.
Ang mga rekisitos nga gikinahanglan gilangkuban sa project proposal nga aprobado sa mayor, utilization report sa kataposan nilang financial subsidy nga kinahanglang kompletong isumite.
"Mo cut off lang ko kay og dili sila maka-submit sa ilang mga documents unsaon man nato paghatag sa tseke nga requirement man na sa atong guidelines, requirement sad na sa COA kay i-check pod na sa COA", matud ni Garcia.
Gipadayag ni Garcia nga ang paghatag sa financial assistance ipaubos kini sa by batch.
Giklaro ni Garcia nga inig lapas na sa Marso 28, 2025 dili na pwede makahatag ang siyudad og ayudatungod kay sugod na kini sa campaign period sa mga local candidate sa umaabot nga national ug local elections karong Mayo 12, 2025.
Ang mayor niawhag sa mga barangay nga paspasan ang pagproseso sa mga rekisitos.
"Dako kaayo ni og tabang kanila kining P5 million para sa mga proyekto ug mga program", ni Garcia pa.
Nasayran nga nigahin ang Cebu City government og P400 milyones nga pundo alang sa maong katuyoan. (BANAT NEWS)
- Latest
