Duterte niatubang sa ICC via video link

CEBU, Philippines — Miatubang sa unang higayon via video link si kanhi presidente Rodrigo Roa Duterte ngadto sa International Criminal Court alang sa iyang first appearance niadtong Biyernes sa gabii, Marso 14, diin gi-beripika iyang pangalan ug personal nga impormasyon.

“I am Rodrigo Roa Duterte… My middle name is Roa, the sur name is Duterte.” “My birthday is March 28, 1945. I was born in the province of Leyte in the Philippines,” tubag pa sa kanhi pangulo sa pangutana.

Gipahibalo sab siya unsa nga kaso ang gipasangil batok kaniya isip “an indirect co-perpetrator” sa pagpatay sa 19 ka gipasanginlang “drug pushers” o mga “kawatan” sa Davao Death Squad gikan 2011 hangtud 2016 sa dihang siya pay mayor sa Davao City, ug laing 24 sab nga gialegar nga mga kriminal gikan 2016 hangtud 2019 sa dihang siya nay presidente sa Pilipinas.

Una niini, gisuwayan unta sa kampo ni Duterte pinaagi sa iyang abogadong si Salvado Medialdea nga ioktaba una ang first appearance aron makaandam sila niini.

Apan wala motugot niini ang korte kay dili kinahanglan og taas nga preparasyon ang initial appearance kay kompirmasyon lang kini ug pagpahibalo bahin sa pasangil. Apan mihatag og konsiderasyon ang ICC nga ipaagi kini sa video link samtang ang kanhi presidente naa sa Scheveningen prison sa ICC.

“As Mr. Duterte made a long journey involving a considerable time difference, the chamber authorized Mr. Duterte to follow the hearing at a distance,” matud pa sa pre-trial chamber presiding judge Iulia Motoc gikan sa Romania, nga niestorya sa pinulongang French nga gihubad sa English interpreter ang iyang gipanulti.

Si Medialdea mitug-an sa korte bahin sa “debilitating medical issues” ug hinay na nga pangdungog ug hanap nga mata ni Duterte.

Misuway sab si Medialdea paghisgot bahin sa legalidad sa pag-aresto kang Duterte nga gitawag niyang “extrajudicial rendition” o “a pure and simple kidnapping.” Midugang sab siya nga “all this is in the nature of political score settling,”  ug “my client was abducted from his country.”

Bahin sa panglawas ni Duterte, si Motoc miingon nga gisusi sa ICC doctor ang kanhi presidente ug kini giingong “fully mentally aware and fit.”

 Gianunsyo sab sa ICC nga ang pre-trial sa kaso himuon unom ka buwan gikan karon o sa Septiyembre 23 aron mahatagan og panahon nga makapanalipod sa iyang kaugalingon batok sa mga gipasangil kaniya.

Atol unya sa pre-trial, anha sutaon sa mga hukom kun duna bay paigong rason nga ipadayon ang kaso o dili.

Si Bise Presidente Sara Duterte kinsa niduaw sa amahan sa hospital wing sa ICC mitug-an nga gisultihan siya niini nga papaulion kini balik sa Pilipinas. Wala silay laing gihisgutan kondili ilang pamilya, legal team ug ang nasud. Matud pang Sara, piskay ra iyang amahan ug giatiman og maayo apan gimingaw na kini sa pagkaong Pilipino.

“When we talked, as a request, he asked me to go home…He repeatedly said “do not leave the country, do not leave the Philippines, you are not supposed to be here,” matud pang VP Sara.

Dihang iyang gisultihan bahin sa mga tawo nga naguol, nasakitan ug nanghilak sa iyang gidangatan, mao ni ang tubag sa kanhi pangulo:“Sabihin mo sa kanila, relax lang, may hangganan ang lahat…There will will be a day of reckoning for all.”

“Sinabi nya (FRRD) As a Filipino, I never surrendered my country!...At sinabi nya, na wala kayong masabi na meron akong ni  sino na binigay sa mga dayuhan,” dugang pa sa bise presidente.

 “I’d like to thank all our countrymen for your prayers and for your profound support for the former president. We can feel your love, we can feel your anger, we can empathize with everyone’s rage with what happened. Let us not forget the real issue in our country that is poverty, corruption, the failure of the government to answer to the demands of the people about accountability and transparency and the failure of our government to address peace and security,” dugang pa ni VP Sara.

Sa pikas bahin, gilusad sa mga supporters ni Duterte ang Cebu Unity Walk- Justice for FPRRD nga gipangulohan ni kanhi Cebu City mayor Michael Rama ug Cebu gubernatorial bet Pamela “Pam” Baricuatro.

Ang kalihokan gisugdan pinaagi sa usa ka Santos nga Misa diha sa Saint Joseph the Patriach Parish sa Barangay Mabolo ug gisunod dayon ang Unity Walk padung sa Plaza Independencia.

Gabii, laing prayer rally ug candle lighting sab ang gihimo sa mga supporters ni Duterte sa Consolacion.

Walay impormasyon gikan sa ICC kun tugotang makabalik sa Pilipinas si Duterte samtang magpaabot sa pre-trial niini sa Septiyembre.