Tax Compliance Verification Drive gilusad sa BIR
CEBU, Philippines — Gilusad sa Bureau of Internal Revenue Central Visayas (BIR-7) ang usa ka semana nga Friendly Tax Compliance Verification Drive (TCVD).
Ang kampanya, nga nagsugod niadtong Lunes, Pebrero 10, 2025, nag-awhag sa mga magbubuhis nga resolbahon ang mga isyu sa buhis.
Suma ni BIR-7 Regional Director Douglas Rufino nga ang kalihukan gituyo aron hatagan og komprehensibong pagsabot ang mga tag-iya ug negosyo sa ilang obligasyon sa pagbayad og buhis.
Ang mga opisyal sa BIR naglibot sa Cebu ug Bohol, ug nakaabot sa mokabat sa 4,000 ka establisamento sa unang adlaw sa kampanya.
Samtang sa nasudnon nga lebel sa unang adlaw pa lang kapin sa 24,000 ka mga establisamento ang nabisita isip kabahin sa kampanya.
Suma pa ni Rufino nga human sa kampanya, gilauman nila nga maabot ang 80% sa mga magbubuhis sa rehiyon.
Lakip sa mga kalapasan nga nahimo mao ang dili pag- issue og resibo, kulang nga mga libro sa mga account, ug ang wala pag-display sa certificate of registration.
Si Rufino nipasabot nga ang kakulang sa mga sakto nga invoice nga gi-issue sa mga kustomer importante para sa Value Added Tax (VAT) ug income tax computation.
Si Evelen Tiu, ang tag-iya sa Cheeva Spa nga nahimutang sa Barangay Panagdait, Cebu City, nagpasalamat sa pamaagi sa BIR sa pagbisita sa ilang negosyo aron susihon ang ilang compliance.
“Basta magsunod lang, up to date ang payment, dili gyud maghadlok sa BIR,” suma pa ni Tiu, nga nag-operate sa negosyo sulod na sa unom ka tuig. (BANAT NEWS)
- Latest
