Vloggers/influencers sa mga politiko kinahanglang magparehistro-Comelec

CEBU, Philippines — Mga social media influencers nga adunay kandidato nga gikampanya ning panahon sa election giawhag sa Commission on Election Central Visayas nga magpa accredit sa ilang kaugalingon.

Si COMELEC-7 Director Francisco Pobe miingon nga kinahanglang magparehistro kanila ang mga political vloggers o mga social media influencers aron masura ang gasto sa kampanya sa usa ka kandidato karon nga eleksyon.

Gipadayag ni Pobe nga centralized ang accreditation ug bugtong ang central office sa Comelec sa kaulohan lang ang maka accredit kanila. Apan ang mga lokal nga political social media influencers mahimong anha lang moduol sa ilang buhatan dinhi sa Central Visayas aron didto mohatag sa ilang mga personal nga impormasyon.

Sila na sa Comelec-7 ang mopadala niini ngadto sa ilang ulohan nga buhatan sa Manila aron sila maisyuhan og accreditation.

Gibutyag ni Pobe, tungod sa kagamay sa ilang mga tawo nga makaatiman sa tanan  iyang giawhag ang komunidad nga motabang usab sa pagpahibalo kanila kun si kinsa kining mga social media influencers.

Sila kadtong mga magsige og post diha sa social media nga pulos ang content mahitungod lang sa usa ka partikular nga politiko sa lokalidad.

Kun dili sila mobolunataryo pagparehistro, ang Comelec-7 na maoy mopahibalo bahin nila didto sa Central Office.

Giklaro ni Pobe, ang tuyo nila sa pagparehistro sa mga influencers aron masuta kung kinsa ni sila ug kung mga binayran sila sa mga politiko para sila ikampanya pinaagi sa social media.

Ang campaign period sa National Elections nga naglangkob sa senatorial and party-list karon February 11, 2025 kon 90 ka adlaw sa dili pa ang election.

Samtang ang local positions kay magsugod sa Marso 28, 2025. (BANAT NEWS)