Batang pusher na-rescue

CEBU, Philippines — Na-rescue pag-usab sa mga operatiba sa Mambaling Police Station 11 Cebu City Police Office ang usa ka 16-anyos nga lalake dihang nagpahigayon sila og operasyon batok sa illegal nga drugas sa Sitio Puntod, Barangay Mambaling, siyudad sa Sugbo, Sabado sa gabii, Pebrero 8, 2025.

Ang na-rescue nga menor de edad mao si alyas Boy, 16 anyos, nagpuyo sa Sitio Naba, Barangay Mambaling ning siyudad, nagtungha sa Grade 9 sa usa ka public school sa siyudad. Nasakmitan ang maong menor de edad og 59 gramos nga shabu nga nagkantidad og P340,000.

Ang maong menor de edad gitugyan na sa Department of Social Welfare and Development sanglit menor de edad man kini.  Nasuta nga dili kini ang unang higayon nga na-rescue ang batan-on sa mga otoridad kay makadaghang higayon na kini nahitabo sa nangagi nilang mga operasyon, apan magsige gihapon og balik-balik.

Sa laing bahin, nagpahigayon ang PDEA-7, PNP Drug Enforcement Group-Special Operations Unit-7 ug Cebu City Police Office Station 7 og buy-bust operation sa Sitio Baskio, Barangay Basak Pardo, siyudad sa Sugbo sa miaging adlaw nga miresulta pagguba sa drug den ug pagdakop sa tulo ka indibidwal.

Nadakpan sa mga operatiba ang subject sa operasyon ug drug den maintainer nga si alyas Tiyo, 25, nga usa ka call center agent ug nagpuyo sa naasoy nga dapit.

Apil sab sa nadakpan ang duha ka tigbisitahan sa drug den nga sila alyas Allan, 38, construction worker ug alyas Rodelio, 40, nga us aka fire volunteer ug parehong residente sa maong barangay.

Nasakmit atol sa operasyon ang unom ka putos sa gituohang shabu nga nitimbang og 11 gramos ug nibalor og P74,800, buy-bust money ug nagkalain-laing drug paraphernalia.

Ang maong operasyon gihimo human makadawat og impormasyon ang mga operatiba nga nalambigit matud pa sa illegal nga kalihukan ang suspetsado.

Duha ka semana ang case buildup ug nahibaw-an nga maka dispose kini og 10 ngadto sa 20 gramos nga shabu kada semana.

Kasong kalapasan sa Sections 5, 6, 7, 13, ug 14, Article II sa Republic Act 9165 ang ipasaka batok sa mga suspetsado. (BANAT NEWS)