CEBU, Philippines — Gironda sa mga operatiba sa PDEA-7 ang duha ka drug den sa mangalahi nila nga operasyon sa Cebu City ug sa Lungsod sa Calape, Probinsya sa Boho niadtong Biyernes, Pebrero 7, 2025.
Pasado alas 7 sa gabii niadtong Biyernes ang PDEA Cebu Provincial Office ug Cebu City Police Office nagpahigayon og buy-bust operation sa Sitio Lubi, Barangay Luz, siyudad sa Sugbo nga miresulta sa pagguba sa drug den pagdakop sa tulo ka indibidwal.
Nadakpan ang subject sa operasyon ug drug den maintainer nga si alyas Raul, 63 anyos, cook, dunay kaipon ug mga trabahante sa drug den nga sila si alyad Anecita, 42 anyos, helper ug igsuon niini nga si alyas Arnulfo, 66 anyos, panday nga pulos naaktuhan naggamit og illegal nga drugas sulod sa drug den.
Nasakmit atol sa operasyon ang unom ka putod sa gituohang shabu nga nitimbang og 11.65 grams ug nibalor og P79,220, buy-bust money, kwarta nga P200 nga halin matod sa illegal nga drugas ug mga drug paraphernalia.
Samtang nihimo sab og buy-bust operation ang mga operatiba sa PDEA Bohol Provincial Office, Calape Municipal Police Station, PNP Bohol Maritime Police, ug PNP Drug Enforcement Group, sa Sitio Lumbag, Barangay Sta. Cruz, Calape, Bohol diin giguba sab ang drug den.
Ang mga suspetsado mao sila si alyas Noel nga subject sa operasyon ug drug den maintainer, 56 anyos, mechanic; alyas Irivin, 26 anyos, security guard, taga Barangay Cabayugan ug alyas Noel, 26 anyos, wala'y trabaho ug nagpuyo sa Lungsod sa Loon, Bohol.
Nakuhaan ang mga suspetsado og siyam ka putos nga drugas nga nitimbang og 11 gramos ug nagkantidad og P74,800 ug uban pa.
Samtang nasakmit sab ang 225 gramo nga shabu nga nagkantidad og P1.5 milyon gikan sa High Value Individual (HVI) nga pusher nga taga Pulang Bato sa Siyudad sa Sugbo nga nadakpan sa buy bust operation sa kapolisan sa Presinto 4 sa Mandaue City Police Office (MCPO) sa dalan M.L Quezon sa Barangay Maguikay alas 11 pasado sa Biyernes sa gabii.
Nadakpan si Devan Serdonez, 46, sa grupo ni Police Staff Master Sergeant Wilkens Enrecuzo.
Matud pa ni Enrecuzo nadakpan na kaniadto tungod gihapon sa mao gihapong kaso kaniadto.
Sa kinatibuk-an, niabot sa P98.4 million ang balor sa illegal nga drugas ug 25 gramos nga marijuana ang nasakmit sa Police Regional Office(PRO)-7 sulod sa 30 ka adlaw isip isip kabahin sa proactive initiative batok sa illegal nga drugas.
Si Police Brigadier General Redrico Maranan, Regional Director sa PRO-7 mitataw nga ang maong kalampusan nagpakita dedikasyon sa nga tinugyanan sa balaod sa pagpakigbatok sa illegal drugs, unlicensed firearms, illegal gambling ug wanted persons.
Gikan sa January 1 hantod sa 31, 2025 ang PRO-7 malampuson nga naka kompiskar og 14,471.34 grams nga shabu nga nagkantidad og P98.4 million ug 25 grams nga marijuana.
Sa maong buwan, nagkalain-laing police units ubos sa PRO-7 ang nagpahigayon og 678 ka operasyon batok sa illegal nga drugas nga miresulta sa pagkasikop sa 787 ka tawo nga nalambigit niini.
Ang maong operasyon naglangkob sa 443 ka buy-busts, 168 ka police responses, 25 ka service warrants ug 42 ka checkpoints. (BANAT NEWS)