Kanhi barangay kapitan nakuhaan og shabu

CEBU, Philippines — Nadakpan sa kapulisan sa Mambaling Police Station 11 Cebu City Police Office ang usa ka 37 anyos nga lalake nga giingong kanhi barangay kapitan ug anak og kanhi sa mayor sa usa ka lungsod sa Lanao del Norte human kini nakuhaan og drugas sa mga polis nga nagpatrolya sa Sitio Puntod, Barangay Mambaling, siyudad sa Sugbo, Sabado sa gabii, Pebrero 1, 2025.

Ang dinakpan mao si alyas Leo, 37-anyos, nagpuyo sa Sitio Mahilum, Barangay Basak San Nicolas, siyudad sa Sugbo.

Nasayran nga ang kapulisan sa Mambaling Police Station nag-foot patrol sa lugar dihang ilang nakit-an ang dinakpan nga kadudahan ang lihok ug sa ilang pagsusi duna kini dalang ilegal nga drugas.

Nakuhaan kini og 0.15 grams nga shabu nga nagkantidad og P1,020.

Matud pa ang dinakpan nahimong barangay kapitan niadtong 2018 apan ni-resign sa katungdanan pagka 2023 ug nianhi dayon og Cebu.

Kasong kalapasan sa Section 11, Article II sa Republic Act 9165 ang ipasaka batok sa suspetsado. — /IBM (BANAT NEWS)