Kapolisan padayon ang imbestigasyon sa kamatayon sa senior citizen
CEBU, Philippines — Imbestigasyon sa kapolisan sa Dumanjug Police Station magpadayon bisan og walay nakitang foul play sa kamatayon sa 83-anyos nga lola sa Sitio Santo Niño, Barangay Candabong sa maong lungsod.
Matud ni Police Captain Eden Rex Baguio, hepe sa Dumanjug Police Station nga wala pa hingpit gitak-opan ang imbestigasyon mahitungod sa nahitabo sa biktima.
Sayo pa, ang biktima nga si Miguela Pocong Barino napalgan nalang sa pag-umangkon niini nga patay na ug ang ulo nabuwag na sa lawas niini.
Gitan-aw sa kapolisan ang ubang posibilidad sa maong insidente hinungdan nga nangita sila og dugang ebidensiya aron makatabang sa ilang imbestigasyon.
Giawhag sa Dumanjug Police Station ang publiko nga likayan ang pag-share og mga impormasyon ilabi na sa social media nga dili validated tungod kay maghatag kini og kahadlok sa katawhan.
"We continue to ensure that all aspects of the incident are thoroughly reviewed, and we are committed to following the investigation wherever it leads. We ask everyone to be cautious in sharing information, as it can cause unnecessary panic", matud ni Baguio.
Nasayran nga ang biktima usa ka biyuda ug walay mga anak apan aduna kini sinagop nga naminyo ug anaa sa Cebu City nagpuyo ug gibiyaan ang biktima sa bukid.
Ang pag-umangkon ug ubang kabanay sa biktima maoy mosusi niini apan panagsa lang gumikan kay distansya ang balay sa biktima.
Ipaubos sa autopsy ang patay'ng lawas sa biktima kini bisan pa og nadugta na dihang nakit-an kini sa iyahang panimalay diin gituohang 48 oras na kining patay.
Ang mga kabayan sa biktima dili makatuo nga giatake sa kasing-kasing ang naulahi. — /BDB (BANAT NEWS)
- Latest
