Kampaniya batok sa mendicancy hingusgan og balik sa CCAMO

CEBU, Philippines — Bisan pa sa ilang padayong paningkamot batok sa mendicancy ang Cebu City Anti-Mendicancy Office (CCAMO) nipadayag nga ang mga nakagamot nga kinaiya sa mendicancy nagpabilin nga labing dakong hagit nga ilang giatubang sa pagsulbad niining maong isyu sa siyudad.

Si Dr. Lucille Mercado, pangulo sa CCAMO nagkanayon nga ilang gihingusgan pag-usab ang ilang mga operasyon batok sa mendicancy human sa pagloag niini sa panahon sa yuletide ug hangtud sa pagsaulog sa Sinulog.

Matud ni Mercado nga nagpadayon usab sila sa ilang Pabalhin Program nga naglakip sa pagkuha sa street dwellers ug pagbalhin kanila sa usa ka shelter sa South Road Property (SRP).

Giklaro ni Mercado nga ang shelter sa SRP naghatag lang og kapoy-an ug walay labot ang paghatag og pagkaon.

Si Mercado nagkanayon aduna sila’y gihimo nga information drive aron sa pag-edukar sa mga nagpuyo sa kadalanan ug mga mendicant (makililimos) kabahin sa mga mandato sa Anti-Mendicancy Ordinance sa Dakbayan sa Sugbo.

Nasayran nga kasagaran sa street dwellers nga nakabenepisyo sa libreng kapoy-an sa SRP adunay mga balay sa siyudad.

Ang mga mendicant lahi usab ang sitwasyon matud ni Mercado diin kadagahanan niini mga bata o mga tawo nga adunay problema sa pangisip.

Gihisgotan usab ni Mercado nga ang uban adunay mga pamilya apan gipili nga magpabilin diha sa kadalanan.

“Pero para nila hayahay man ang anha sila sa dalan, wala silay abang, naa silay suga, libre nila kay pirming naay tawo, it's their attitude, nya naanad bitaw na maghuwat lang pirmi og ayuda, hatag-hatag lang pirmi”, ni Mercado.

Gipasabot ni Mercado nga bisan niini padayon gihapon sila sa pagluwas sa mendicants nga nagsuroy-suroy sa kadalanan.

Giingong nagkadaghan ang mendicants panahon sa pasko tungod kay ilang gipahimuslan ang pagdagsa sa mga tawo ug gihulagway ni Mercado nga kini nga panahon usa ka magnet alang sa mendicants tungod kay makapahimulos sila sa libre nga panginabuhi.

Nunot niini, gi-assess ni Mercado nga epektibo gihapon ang anti-mendicancy campaign sa Dakbayan sa Sugbo nga kong wala ang mga paningkamot batok niini ang gidaghanon sa mga mendicant dili mapugngan sa pagdahan.

Dugang ni Mercado nga mas dako nga hagit nila ang mga psychotic mendicant tungod kay dili na sila madala og estorya.

“Kadaghanan ani kay di man ni taga ato, kining mga psychotic”, ni Mercado pa. — /BDB (BANAT NEWS)