9,000 ka mag-uuma sa Cebu City gikatakdang hatagan og ayuda

CEBU, Philippines — Gibana-bana nga duha ka tuig human kini maaprobahan ang P50 milyones nga balor sa livelihood assistance alang sa 9,000 ka mag-uuma gikatakdang iapod-apod sa Dakbayan sa Sugbo subay sa Food Security Ordinance.

Kini ang gikompirma ni Arlie Gesta, pangulo sa Cebu City Agriculture Department (CAD).

Si Gesta nagkanayon nga anaa na sila sa proseso sa paghatag og P50 milyones nga balor sa livelihood assistance ngadto sa 9,000 ka rehistradong mag-uuma sa Dakbayan sa Sugbo.

Matud ni Gesta nga ang maong budget appropriation naaprobahan niadtong tuig 2023 pinaagi sa ordinansa nga gipangamahanan ni Konsehal Philip Zafra.

Kasamtangan nilang giproseso ang gikinahanglang mga dokumento aron makakuha og exemption certification gikan sa Commission on Elections (Comelec) subay sa pagdili sa pag-release sa mga resources sa gobiyerno atol sa panahon sa eleksiyon.

Ug kong mahuman na ang proseso giingong matag usa sa 9,000 ka mag-uuma makadawat og P5,000 nga hinabang.

Gipasabot ni Gesta nga ang matag mag-uuma nga beneficiary kinahanglang mosumiter og plano sa proyekto aron masubay ang paggamit sa maong tabang pinansiyal.

Gawas nga usa ka rehistradong mag-uuma ubos sa Registry System of Basic Sectors in Agriculture (RSBSA), si Gesta nagkanayon nga ang matag beneficiary kinahanglan usab nga miyembro sa ilang tagsa-tagsa ka asosasyon sa mga mag-uuma.

Gibutyag ni Gesta nga target nila nga mahatag ang hinabang sa buwan sa Marso karong tuiga ug gikinahanglan niini ang Comelec exemption certification.

Dugang ni Gesta nga ang Cebu City abunda sa resources ug ang nahibilin nga tahas mao ang pagdugang sa mga programa nga makatabang sa mga mag-uuma sa pagpakunhod sa ilang gasto sa produksiyon.

Sayo pa, si Gesta nagkanayon nga ang ordinansa nagmando og P100 milyones nga budget appropriation alang sa food security programs; apan, P50 milyones ra ang naaprobahan ug naglaom sila nga mahatagan og dugang pundo ang konseho aron ma-accommodate ang mga wala pa maapil sama sa mas dagkong farmer producers.

Niadtong Nobiyembre 27, 2024 ang Cebu City Council nanawagan sa executive department nga ipatuman ang mandato sa Food Security Ordinance human nga kadaghanan sa mga miyembro nipadayag og kabalaka sa wala paggamit sa mga programa nga gitumong sa pagsuporta sa mga mag-uuma. — /BDB (BANAT NEWS)