BFAR nigahin og P56 milyon alang sa SAAD phase II

CEBU, Philippines — Ang Bureau of Fisheries and Aquatic-Resources-7 nigahin og P56 milyones alang sa pagpatuman sa Special Area for Agriculture Development (SAAD) phase II karong tuiga.

Kini ang gipadayag sa Public Relations Development Communication Designate sa BFAR-7 Mailyn Cadavid.

Gitambongan sa mga partisipante gikan sa regional ug provincial program management support offices sa BFAR-7 ang gipahigayon nga Work and Financial Planning Workshop diin anaa ang pagtinabangay sa pagplano ug paghan-ay alang sa physical ug financial aspect sa matag component program sa SAAD.

Matud ni Cadavid nga ang maong pagplano nagpakita kini sa kasigurohan ug husto nga implementasyon sa SAAD phase II ug ang budget nga gigahin magamit gyud sa pagpalambo sa panginabuhi sa mga mananagat ug kalamboan sa agrikultura sa rehiyon-7.

Dugang ni Cadavid nga mahinungdanon kaayo ang maong workshop sa paghimo og tinuod nga epekto alang sa komunidad ug pagpauswag usab sa kabarangayan. BDB BANAT NEWS