Manag-inahan niinom og hilo?

CEBU, Philippines — Gibutyag sa hepe sa San Fernando Police Station Major Michael Gingoyon nga ipaubos nila sa forensic examination ang putos sa insecticide nga nakuha duol sa tolda nga temporaryong gipuy-an niadtong inahan ug 3-anyos nga anak niining babaye nga nakit-an nalang nga wala'y kinabuhi.

Buot sutaon sa kapolisan kun ang insecticide konektado ba sa kamatayon sa duha nga una nang gituohan nga niinom og hilo gumikan kay gabuwa na ang ilang mga baba sa dihang napalgan.

Nag-request na sila og autopsy examination sa Regional Forensic Unit-7 sa duha apan sa pagkakaron, dili gusto sa pamilya sa duha nga ipa-autopsy ang duha kay wala silay ikabayad niini.

Si Gingoyon miingon nga  importante nga ma-awtopsiya ang duha aron mahibaw-an gyud ilang gikamatyan.

 Nasayran nga na-estorya na sab sa kapulisan ang kanhi live-in partner sa ginang ug kini mitug-an ngadto nila nga ang pagpang-harass sa kanhi kaipon dili direkta sa biktima apan ngadto sa amiga niini tungod kay nasuko ang kapuyo nganong gipapuyo niini ang iyang manag-inahan didto sa tolda.   IBM BANAT NEWS