Patigayon nga dili mohatag og diskwento sa mga seniors silotan

CEBU, Philippines — Gipahimangnoan karon sa kagamhanan sa siyudad sa Lapu-Lapu ang mga establisamento nga magdumili sa paghatag og 20 porsiyento nga diskuwento sa mga senior citizen nga mag-atubang og silot nga naglakip sa revocation sa permits o lisensiya.

Si Lapu-Lapu City mayor Junard "Ahong" Chan miingon nga ilang sugdan ang hugot nga pagpatuman sa balaud pinaagi sa pagbutang og stickers sa mga establisamento nga nagpahimangno sa pagtuman sa balaod ilabi na ang paghatag og 20 porsiyento nga diskuwento sa mga senior citizen.

Matud pa ni Mayor Chan nga ang blue ug white nga stickers ilang ibutang sa tanang establisamento nga naglakip sa duha ka botika sa Rose Pharmacy sa Tamiya sa  Barangay Basak ug Mercury Drug nga nahimutang duol sa La Nueva Supermarket.

Dugang mga establisamento nga gibutangan og stickers alang sa hugot nga pagpatuman sa 20 porsiyento nga diskwento mao ang Tuna Republic nga nahimutang sa Patalinghug Avenue, Gaisano Island Mactan ug Marina Seaview Restaurant sa Barangay Ibo.

Lakip sa gipahimangno sa matag establisamento mao nga dili na kinahanglan ang pagpresentar og purchase booklet sa paghatag og diskuwento pinasikad usab sa Department of Health's Administrative Order 2024-007.  MEL BANAT NEWS