CEBU, Philippines — Gipangulohan ni Mandaue City Mayor Glenn Bercede ang gipahigayon nga Performance Governance System (PGS) forum sa kagamhanan sa siyudad sa Mandaue niadtong miaging adaw.
Gitambongan kini sa mga department head uban usab si kanhi mayor Jonas Cortes ug kanhi Mandaue City Treasurer Atty Regal Oliva isip mga dinapit nga bisita sa maong kalihokan.
Sa maong forum gipresentar sa nagkalainlaing departamento sa kagamhanan sa siyudad sa Mandaue ang ilang mga natampo sa kalamboan sa pagserbisyo sa mga Mandauehanon.
Sila si Mayor Bercede uban ni kanhi Mayor Jonas Cortes ug kanhi City Treasurer Atty. Regal Oliva ang nangulo sa pag-abli sa 2025 Mandaue Governance Forum.
Ang Forum gihimo isip sukdanan sa mga serbisyo kon aduna bay impact o wala sa publiko o naghatag kini og kalamboan sa serbisyo sa katawhan.
Naglakip sa mga serbisyo nga gitampo ug gipalambo nga gipresentar mao ang serbisyo sa panglawas, edukasyon nga gihatagan og dakong pagtagad sa kagamhanan.
Ang 2025 Mandaue Governance Forum ipahigayon sulod sa upat ka adlaw aron masayran ang kalamboan uban sa mga panelist ug mga department head. (BANAT NEWS)