Drones gigamit pagpangita sa suspek

CEBU, Philippines — Nigamit og drone ang kapolisan sa dakbayan sa Naga aron sa pagpangita sa amahan nga niunay og patay sa iyang kapuyo ug sa duha niini ka mga anak niadtong adlaw nga Lunes.

Gi hospital arrest karon ang suspek nga si Carlo Comporedondo,33,   ang padre de pamilya nga mipatay sa iyahang kaipon ug duha ka mga anak human kini napusilan sa mga polis kay matud pa nisuway og sukol sa dihang ilaha na kining dakpon nianang Lunes sa hapon.

Nagkanayon si Police Lieutenant Colonel Verniño Noserale, hepe sa City of Naga Police Station nga dul-an sa unom ka oras nilang gigukod ug gipangita ang suspek nga daling misibat human niya mahimo ang linuog nga krimen sa iyang pamilya.

Kaabag sa City of Naga Police Station ang ubang ahensiya sa gobyerno  sa pagdakop sa suspek ug nigamit sila og drones gumikan sa kalapad sa posibleng nahimutangan niini sa iyahang pag eskapo.

"With the help Provincial Intelligence Unit and Toledo City Police Station, naa pud mga taga LGU nato particularly the CCDRRMO personnel we utilize their available drones kay grabe gyud ka lapad ang area to scan its location didto nga possibly located ang suspect," sigon ni Noserale.

Nasayran dunay nigawas nga estorya matud pa nga naay problema sa pangisip ang suspek nga si Carlo Comporedondo, 33 anyos.

Apan gitataw ni Noserale nga naa sa suspetsado ang 'burden of proof' , pamatud-an niya sa korte nga siya wala sa saktong huna-huna dihang nahimo ang pagpatay sa iyahang 32-anyos nga kaipon ug 2 anyos ug 11 anyos nga anak.

Ipasaka ugmang adlaw sa kapulisan sa Dakbayan sa Naga ang kasong murder ug two counts of parricide batok sa suspetsado karong adlawa.

"That would be his burden either he will have the assistance of medical expert for that purpose," ni Noserale pa.

Nasayran nga pipila sa motibo nga gisubay ang kapulisan mao ang pangabubho, away sa kwarta, pagkagumon sa ilegal nga drugas ug online sugal nga 'scatter' maong nahimo sa suspek ang krimen.

Giingong ang pagkagumon sa suspect sa sugal maoy sagad awayan matod pa nila sa iyahang kaipon kay naay panahon nga tapulan na kini maninda og butong nga maoy ilang panginabuhian kay walay saktong tulog human nabilar tungod sa sugal.

"Mao man gyud nay ilang ginaawayan kay magtinapolan daw ni si Carlo sa ilahang pagpamaligya og buko because of mabilar sa cellphone usa ana ang cause is scatter ana ba, it could be involved pud siya sa other forms of gambling but mao man ni kumbaga nakaapekto gyud sa ilahang livelihood nga pagpamaligya og buko," matod ni Noserale.

Ang 7-anyos nga anak sa managkapuyo na-anghelan kay nieskuyla anang adlawa. Ang bata naa karon sa kostudiya sa  sa City Social Welfare and Development alang sa interventions.

Sa pikas bahin, ang kagamhanan sa Dakbayan sa Naga, motabang sa pagpahiluna sa mga nakalas  matud pang Mayor Valdemar Chiong sa Dakbayan sa Naga.

Ang City SWDO mao roy niatiman sa bata, sa apohan ug iyaan biktima nga igsuon sa iyang inahan alang sa debriefing sessions tungod sa makalilisang nga kasinatian nga ilang nahiaguman.

Base sa impormasyon sa mayor sa initial assessment ngadto sa bata dili pa kaayo klaro ang trauma niini kay wala siya personal nga nakasaksi sa gibuhat sa iyang amahan ngadto sa iyang inahan ug sa iyang mga maguwang.

Ang CSWD social workers mopahigayon ug home/risk assessment aron sa pagdeterminar sa kaluwasan og kaandam sa pamilya sa namatay nga inahan sa pag-atiman sa bata nga nahabilin.

Sa mensahe nga gipadala sa mayor sa Banat News/DyRF1215, ilang ibalik sa pamilya ang sulod ning semanaha kung positibo ang home assessment gikan sa iyaan.

Si Archbishop Jose Palma, sa Archdiocese of Cebu nasubo ug nasakitan sa maong hitabo ug nidalit og pag-ampo alang sa kapahulayan nga dayon sa mga biktima.

Gibutyag sa Arsobispo nga gitahasan niya ang Cebu Caritas sa pagtabang sa nagbangutan nga banay.  IBM BANAT NEWS