Sobra usa ka kilong shabu nasakmit

CEBU, Philippines — Nadakpan sa mga operatiba sa City Intelligence Unit ug City Drug Enforcement Unit sa Lapu-Lapu City Police Office ug PDEA-7 ang usa ka high value individual atol sa ilang buy-bust operation sa Sitio Seaside, Barangay Pajo, Lapu-Lapu City niadtong Lunes sa gabii, Enero 27, 2025.

Ang suspetsado mao si Regin Rex Oporto Añora alyas Rex, 45, nagpuyo sa Purok Bangan, Barangay Cabancalan, Dakbayan sa Mandaue.  Nakuhaan ang suspetsado og 1,025 grams nga shabu nga nagkantidad og dul-an P7 million.

Nagkanayon si Police Colonel Dyan Vicente Agustin, Acting City Director sa Lapu-Lapu City Police Office nga ang suspetsado dugay na namaligya matud pa og illegal nga drugas tungod kay sa impormasyon nga nakuha nila naa ni mga kauban nga nadakpan na sab sa uban dapit.

Gipaubos nila sa tulo ka semana nga monitoring ang suspetsado ug giingong maka dispose kini og 250 grams nga shabu kada semana ug dili lang Lapu-Lapu City ang area of disposal niini apan apil na ang mga silingan nga siyudad.

Padayon ang imbestigasyon sa kapulisan sa dakbayan sa Lapu-Lapu aron mahibaw-an kun asa gikan ang mga drugas nga nasakmit gikan sa suspetsado. Romeo D. Marantal, IBM BANAT NEWS