Apostolic nuncio nitambong sa installation ni Labajo

CEBU, Philippines — Bagang duot sa magtutuo ang nitambong sa Canonical Possession and Solemn Installation of His Excellency Most Reverend Ruben Labajo, D.D isip bag-ong obispo sa Diocese of Prosperidad, Prosperidad Agusan Del Sur kagahapon sa buntag.

Gatusan ka obispo ug kaparian ang nitambong usab sa maong kalihokan lakip sa nitambong si Archbishop Charles John Brown, apostolic nuncio to the Philippines.

Gipahigayon una ang mubo nga procession kinsa si Labajo giubanan sa mga kaparian nga madestino sa Prosperidad ug gidawat kini sa atubangan sa St. Michael the Archangel Cathedral nga anaa usab ang opisyales sa Prosperidad.  Usa ka mubo nga selebrasyon usab ug pagpalanog sa opisyales sa probinsya sa ilang mensahe ug lakip ang pagtunol sa token ngadto sa obispo diin gitawag kini og civic reception.

Human sa civic reception gisunod ang Holy Eucharistic Celebration, Solemn Installation and Canonical possession.

Unang nisulod si Labajo sa cathedral diin nihalok kini sa cross gisunod ang pag- blessing ug paghatud kaniya sa altar.

Gibasa usab ang pagdeklara kang Labajo isip bag-ong obispo sa Diocese of Prosperidad nga gitahas sa Santo Papa ug paglingkod na dayon niya sa iyang lingkuranan.

Human sa mubo nga kalihokan gisunod ang Santos nga Misa nga gidumala una ni Archbishop Jose Cabantan sa Archdiocese of Cagayan de Oro City ug gitapos kini ni Labajo.

Si Labajo mapasalamaton sa tanang lumilihok sa kalamposan sa iyang pag-instolar isip bag-ong obispo.

Gipadayag ni Labajo nga human sa iyang pag-instolar bisan ug dili mawagtang ang iyang pagka-Sugboanon apan gideklara niya ang iyang kaugalingon nga usa na ka Agsurnon ug andam na siya sa iyang bag-ong tahas ug moserbisyo alang sa iyang tanang katawhan.

Si labajo mapasalamaton usab sa tanang nipaambit sa ilang suporta ilabi na sa obispo sa Diocese of Butuan nga si Bishop Cosme Damian Almedilla ug sa arsobispo sa Archdiocese of Cebu nga si Archbishop Jose Palma, D.D. BDB BANAT NEWS