Nganong nakalusot ang shabu?

CEBU, Philippines — Girelibohan sa kadagkoan sa Philippine Coastguard ang deputy commander sa PCG-Masbate tungod sa paglusot sa P170 milyones nga shabu nga gisakay og roro nga barko padung sa Cebu City diin kini na-intercept sa mga otoridad diha sa Pier 4.

Niadtong Enero 23, 2025 nakurat ang Sugbu sayo sa buntag human dunay 25 ka kilo nga shabu nga nasakpan diha sa mao Pier 4 nga gidala sa manag-inahang sila si Edna,63, ug anak nga si Edward Loga,46.

Ang mga sakop sa Philippine Drug Enforcement Agency-7 nagkanayon nga ang duha nisakay og roro gikan sa Masbate nga nidunggo sa maong pantalan sa Cebu City. Apan sa dihang nadiskarga na ang ilang awto gikan sa barko nabantayan kini nga daw gusto dayong makagawas sa pantalan ang awto nga sama og gustong molikay sa K9 inspection sa pantalan, apan napugngan kini.

Ang 5-anyos nga PDEA-7 K9 nga si Bayani gipasulod sa awto aron simhoton ang mga bagahe sa sud ug nabantayan nga wala kini mahimutang hinungdan nga gimandoan si Edward sa mga ahente nga ipakanaog ang selyadong karon ug didto nasakpan ang ilegal nga drugas.

Ang duha gikatakdang pasakaan og kasong paglapas sa Republic Act (RA) No. 9165 or the Comprehensive Dangerous Drugs Act of 2002 ug uban pang posibleng kalapasan.

Matud pa nga sa wala pa ang pagkasakop sa maong kontrabando, aduna nay panagtigum nga gihimo ang mga kadagkoan sa PCG, PDEA , Department of Justice (DOJ), Philippine National Police Maritime Group (PNP MG), Naval Intelligence and Security Group (NISG), Cebu Ports Authority (CPA), ug Bureau of Customs (BOC) bahin aning illegal drugs gikan sa Masbate nga padung sa Cebu City luwan sa roro nga barkong pasaheroan alas- 10 sa gabii sa Enero 22, 2025.

Apan nakurat ang PCG sa ilang imbestigasyon kay nigawas nga gilamo-lamoan ra pag-inspeksyon sa PCG-Masbate ang mga pasahero ug kargamento sa maong roro. Maayo nalang nga na-intercept ang duha pag-abot sa Cebu City.

Si PCG Commandant, Admiral Ronnie Gil L Gavan mimando dayon sa pagtangtang sa Coast Guard Station (CGS) Masbate Deputy Commander alang sa  imbestgasyong administratiba batok niini.

Apan ang maong CGS Masbate Deputy Commander nangrason nga duna kini gitambungang courtesy meeting dihang nahitabo kini.

Sumala pa sa ilahang mandato ang paghimo og inspeksyon sa mga barko alang sa kaluwasan sa tanan, ug apil sa ilang trabaho ang pagkontrol ug pagsikop sa mga gibiyaheng ilegal nga drugas sa kadagatan sa nasud.

Samtang wala ginganlan sa pamahayag sa PCG kun kinsa ang maong Deputy Commander, ang PCG Bicol sa post sa ilang Facebook post miila kaniya nga si LTJG Arjohn B. Belumba.

Tungod niini ang Coast Guard District Bicol ni- deploy og dugang upat ka (4) K9 narcotics detection dogs, ilanghandlers  ug laing tulo ka bomb sniffing K9 sa tanang pantalan ubos sa ilang hurisdiksyon. (BANAT NEWS)