CEBU, Philippines — Patay ang usa ka high value individual nga giingong misukol sa mga operatiba sa Waterfront Police Station 3 Cebu City Police Office (CCPO) atol sa ilang buy-bust operation sa Sitio Silangan 2, Barangay Tejero, siyudad sa Sugbo kagahapon sa hapon, Enero 23, 2025.
Ang namatay mao si Fredo Juntong, nagpuyo sa maong lugar nga apil sa drug watchlist.
Matud pa samtang natigayon ang buy-bust, nakabantay si Juntong nga polis iyang katransaksyon ug dali niya kining gitukmod ug nidagan paingon sa third floor sa balay nga iya sa iyahang tawo nga nga tig-repack sa illegal nga drugas.
Gikataho nga gipusil sa suspek ang polis nga nisunod kaniya sa taas apan wala makaigo.
Sigon ni Police Major John Lynbert Yango, hepe sa Waterfront Police Station 3, nakabantay ang suspek sa paghamag sa mga backup nga polis maong gitukmod niini ang poseur buyer.
Napugos matud pa sa pagbawos ang mga polis apan naantimano kini.
Si Yango miingon nga bag-o lang nakagawas sa prisuhan sa miaging tuig ang suspek gikan napriso tungod sa illegal nga drugas.
Matud pa nag-repack og drugas ang grupo tungod kay pista sa maong sitio ug gituohang ipang-dispose kini anang adlawa, apan giatol sa kapolisan ang maong buy-bust operation. Na-recover sa kapulisan ang kalibre .45 nga armas sa suspek nga dunay lima ka bala ug ang misfired nga bala sa kalibre .45, gituohang shabu nga 100 grams nga padung na i-repack unta.
Duha sa iyang mga tig-repack og drugas nga silang Dionesio Canania alyas "Isyot", 37, ug Ronie Porquiado, 50.
Sa laing operasyon, nadakpan sa Mabolo Police Station ang armadong lalaki nga nakuhaan og illegal nga drugas diha sa Sitio Vicente, Barangay Mabolo, siyudad sa Sugbo niadtong Miyerkules sa hapon, Enero 22, 2025.
Ang suspetsado mao si Jake Saraum Fernandez, 20, taga Sitio San Isidro sa maong barangay.
Nagkanayon si Police Major Romeo Caacoy Jr., hepe sa Mabolo Police Station 4 nga naaktuhan ang suspetsado nga gadala-dala og armas nga kalibre. 38 revolver nga dunay mga buhing bala.
Sa dihang girekisa nakuhaan kini og shabu nga nitimbang og 110 grams ug nagkantidad og P748,000. Ang dinakpan maoy suspek sa pagpusil sa usa ka babaye niadtong Lunes sa Sitio Back APM. Ang armas nga nasakmit sa kapulisan giingong mao sab ang gigamit niini pagpusil sa biktima nga gidudahan niya nga asset.
Nadakpan na sab siya kaniadto tungod gihapon sa illegal nga drugas. (BANAT NEWS)