5.8 magnitude nga linog sa Leyte nitay-og sa Sugbu

CEBU, Philippines — Nabulabog sa makadiyot ang mga Sugbuanon human usa ka linog ang nasinati Huwebes sa buntag, Enero 23.

Sumala pa sa Philippine Institute of Volcanology and Seismology usa ka 5.8 magnitude nga linog nga tectonic ang origin sa San Francisco Southern Leyte.

Base sa mga natala nga intensities ang Intensity VI-San Francisco, Southern Leyte; Intensity V - Ubay, Bohol.

Samtang Intensity III  sa Cebu City; Intensity II - Tubigon, Bohol; Catmon, Danao City, City of Naga, City of Talisay, Cebu; Lapu-Lapu City; Mandaue City.

Samtang Intensity I sa Argao, Borbon, City of Carcar, Carmen, Compostela, Consolacion, Dalaguete, Liloan, Minglanilla, San Francisco, ug Sogod, CEBU.

Adunay mga natala usab nga kadaut sa mga dalan ug panimalay base sa hulagway nga gipagawas sa pipila ka mga apektadong residente sa San Francisco Southern Leyte ug sa Office of the Civil Defense.

Dinhi sa Cebu City, napugos sa pagpagawas sa ilang mga estudyante ang mga tunghaan tungod sa pagtay-og sa linog sama sa Cebu Normal University, University of San Jose Recoletos ug uban pa.

Ang Office of the Building Officials dali sab dayong nilibot sa nagkadaiyang mga edipisyo aron pagsigurong walay kadaut o nangliki niini alang sa kaluwasan sa mga tawo.

Wala hinuoy natalang kadaut nga gibilin dinhi sa Sugbu ang maong linog. (BANAT NEWS)