CEBU, Philippines — Gi-anunsiyo sa pangulo sa Cebu City Treasurer’s Office Mare Vae Reyes ang tanang taxpayers sa siyudad nga kutob nalang sa Enero 31, 2025 ang paglukat ug pag-renew sa business permit alang karong tuiga. Human naaprobahan sa konseho siyudad ang paglugway sa paglukat ug pag-renew sa mayor’s business permit nanghinaot si Reyes nga mobisita na ang mga taxpayer sa ilang buhatan nga anaa nahimutang sa SM Seaside ug Robinson’s Galleria.
Giklaro ni Reyes nga bukas ang ilang buhatan karong Sabado, Enero 25, 2025 ug bisan pa sa holiday o atol sa Chinese New Year karong Enero 29, 2025.
Tumong niini aron dili magdasok ang mga taxpayer sa kataposang adlaw sa tiglukat ug ting-renew sa mga business permit.
Sa usa ka video nga gi-upload sa Cebu City Public Information Office nangayo usab og pasensiya si Reyes nga wala ka proseso ang ilang buhatan sa SM Seaside sulod sa duha ka adlawa tungod kay nakasinati kini og technical difficulty apan karon hingpit na kini nga makaproseso sa mga gikinahanglan sa mga taxpayer. (BANAT NEWS)