CEBU, Philippines — Patay ang usa ka 24-anyos nga lalake human kini gidunggab sa duha niini ka mga kaila nga gaduda niya nga asset sa polis diha sa Barangay Luz, siyudad sa Sugbo, Lunes sa kadlawon, Enero 20, 2025.
Ang biktima mao si Ian Vanlor Lumapas, 24 anyos, nagpuyo sa naasoy nga dapit. Samtang ang mga suspek mga kaila ra niini nga nagpuyo ra sab sa maong barangay.
Sigon ni Police Major Romeo Caacoy Jr., hepe sa Mabolo Police Station 4 Cebu City Police Office(CCPO) ang mga suspetsado napriso na kaniadto gumikan sa kasong kalambigitan sa illegal nga drugas.
Giingong duna nay karaang bikil ang mga suspek ug ang biktima kay gidudahan nilang police asset.
Gikataho nga nagduwa sa internetan ang biktima anang tungora sa dihang dunay tawong miduol kaniya aron siya pagawason. Tuod man, migawas kini apan gisugat kini sa mga suspek ug gitabangan og dunggab sa nagkadaiyang bahin sa iyang lawas.
Padayon pang gipangita sa kapulisan ang mga suspek nga daling misibat. Ang ilang krimen na-rekord sa CCTV diha sa maong lugar hinungdan nga sila nailhan dayon sila sa kapulisan.
Sa laing bahin, nalandig sa tambalanan ang usa ka habal-habal driver human siya gidunggab sa kauban ra pud niyang habal-habal driver tungod sa pag-ilogay og pasahero diha sa Barangay Pitogo, Lungsod sa Consolacion niadtong Domingo sa gabii, Enero 19, 2025.
Ang biktima mao si Ernesto Sasing Valle, 51, residente sa Antipolo sa maong lungsod samtang ang suspek mao si Rodel Gantalao, 39, taga Jugan, Consolacion.
Nagkanayon si Police Staff Sergeant Cresenciano Saladaga Jr., sa Consolacion Police Station nga nagkalalis ang duha kay nag-ilog sa pasahero apan nikuha ang suspek og kutsilyo ug gidunggab sa liog ang biktima.
Daling nisibat ang suspek ug niadto kini sa dakbayan sa Talisay tungod kay naa kini maguwang nga tanod ug kini mitahan sa Talisay City Police Station niadtong Lunes sa gabii, Enero 20, 2025. IBM BANAT NEWS