Wanted nisukol, patay

CEBU, Philippines — Niresulta sa engkwentro ug kamatayon ang pag-serve sa kapulisan sa Tuburan Police Station og warrant of arrest batok sa usa ka 31 anyos nga wanted sa kasong kalapasan sa Republic Act 9165 sa Barangay Fortaliza, Lungsod sa Tuburan, kagahapon sa kadlawon, Enero 21, 2025.

Patay ang suspek nga si Alfredo Batalona Bantay Jr., alyas Wilfredo Bantay, 31, taga Purok Butterfly, Barangay Babag, Dakbayan sa Lapu-Lapu.

Sa impormasyon sa Tuburan Police Station ang tracker team sa istasyon nakadawat og impormasyon nga nasigpatan ang suspetsado  nga gaatang og bus.

Ang suspetsado dunay pending warrant of arrest sa kasong kalapasan sa Section 5, Article II sa Republic Act 9165 gikan sa Regional Trial Court Branch 29, Toledo City ang nag-isyu penetsahan September 26, 2024 ug wala'y piyansa nga girekomendar.

Pag-abot sa kapulisan sa dapit ug i-presentar na unta ang kopya sa warrant of arrest giingong nibunot kini og armas gikan sa iyang hawak ug gipusil ang tracker team apan nikagar iyang armas ug wala nakabuto.

Ang back-up nakakita nga hitabo mibawos pagpusil sa suspek ug naigo kini sa lawas.  Gidala sa ANDAM Tuburan Emergency Responder ang suspek sa Tuburan District Hospital apan gideklarar kining dead-on-arrival.

Gawas sa pending warrant of arrest sa suspect giingong mao sab kini ang Person of Interest (POI) sa mga kawat nga nahitabo sa igtataring manok sa maong lungsod.

Alas 11 sa gabii niadtong Enero 20, 2025 namuhi og manok pangtari ang ni-report sa kapulisan nga gikawatan kini og tulo ka manok igtatari.

Na-recover gikan sa suspek ang .38 kalibreng rebolber nga dunay duha ka bala ug usa ka bala nga wala nakabuto.

Nakuha sab sa otoridad ang upat ka manok igtatari, duha ka bayong, ug usa ka black bag container nga dunay duha ka sab ka manok pangtari.  IBM BANAT NEWS