CNU magtukod og centralized student smart hub

CEBU, Philippines — Mihimo og mahinungdanong lakang ang Cebu Normal University (CNU) paingon sa paningkamot niini sa pagkab-ot sa "innovative and modernized learning" pinaagi sa groundbreaking sa P947.83-million Centralized Student Smart Hub kagahapon, Enero 20, 2025.

Kini maoy timaan nga ang smart campus initiative niini mas duol na sa kamatuoran.

Atol sa labing unang Annual True State of the University Address (ATSUA) sa CNU, usa sa mga highlights sa pakigpulong ni Presidente Dr. Daniel A. Ariaso, Sr., PhD, CESO I mao ang pag-uswag sa smart campus project nga kabahin sa padayon nga paningkamot sa unibersidad sa paghatag og state-of-the-art nga mga pasilidad alang sa mga estudyante ug mga magtutudlo.

Gibutyag ni Dr. Ariaso nga P950 milyones ang giaprobahan nga budget alang sa pagtukod sa Centralized Student Smart Hub.

Gawas sa smart campus, giaprobahan usab ang P998.86 milyones nga budget alang sa Information Communication Technology o ICT modernization development program nga gikatakdang ipatuman karong tuiga.

Ang mga kontrata alang sa duha ka proyekto, nga nagkantidad og kapin sa P1.9 bilyones, gihatag ngadto sa Lancaster Technology and Development Corporation.

Uban sa pag-aproba sa CNU Board of Regent Resolutions Nos. 266 (Smart Campus) ug 267 (ICT project), ang mga dagkong proyekto gihatag ngadto sa Lancaster Technology and Development Corporation, nga adunay kinatibuk-ang contract price nga P1,946,696,250.

Si Dr. Ariaso miingon nga sa kinatibuk-ang kantidad, P30 milyones ang igahin sa labing unang university-run broadcasting radio station sa Unibersidad, diin iyang gipadayag nga posibleng sila ra ang nag-inusarang State University Campus (SUC) nga makadawat niining proyektoha.

Sumala sa CNU, ang Lancaster, usa ka Taguig-based firm, maoy bugtong supplier nga misumiter og bids alang sa duha ka proyekto, nga adunay kantidad nga P998,864,500 alang sa ICT project ug P947,831,750 para sa Smart Campus project. (BANAT NEWS)