CEBU, Philippines — Pito ka lungsod ug siyudad sa Probinsiya sa Sugbo ang anaa sa top 10 nga local government units sa tibuok Central Visayas sa 2023 Seal of Child-Friendly Local Governance (SCFLG) sa Department of Interior and Local Government (DILG).
Sa top 10, nag-una niini ang Lungsod sa Sogod nga maoy nakakuha og taas nga rating nga 97.11 porsyento, gisundan sa Lungsod sa Catmon nga 95.79 porsyento ug ika-tulo ang Siyudad sa Lapu-Lapu nga nakakuha og 95.17 porsyento.
Ang Dakbayan sa Talisay nabutang sa top 4 diin aduna kini 94.50 porsyento nga rating; ika-lima ang Siyudad sa Carcar nga adunay 94.33 porsyento; ika-unom ang Lungsod sa Calape, Probinsiya sa Bohol nga nakakuha og 94 porsyento; ika-pito ang Lungsod sa Tudela nga adunay 93.73 porsyento; ika-walo ang Lungsod sa Balamban nga adunay 93.50 porsyento; ika-siyam ang Lungsod sa Loay, Probinsiya sa Bohol nga dunay 93.14 porsyento ug ika-10 ang Lungsod sa Santander nga nakakuha og 93 porsyento nga rating.
Matud sa DILG niabot sa 895 ka lungsod ug siyudad ang nakapasar sa Child-Friendly Local Governance Audit ug makakuha sa Seal of Child-Friendly Local Governance.
Kini human sa gihimong review sa National Inter-Agency Monitoring Task Force and Council for the Welfare and Children niadtong Hulyo 29 hangtud Agosto, 2024.
Ang Child-Friendly award gikan sa DILG ngadto sa mga LGU usa ka pasidungog alang sa mga LGU nga adunay igo ug saktong programa nga gipatuman pagsiguro sa “well-being” sa mga bata sa ilang mga lugar.
“It aims to inform and influence the planning and programming of LGUs towards achieving the envisioned goal where children are accessing inclusive social services and lives free of poverty in all dimensions by putting primacy on child-rights responsive governance and accountability”, dugang sa DILG. (BANAT NEWS)