CEBU, Philippines — Nagmalampuson ang gilatag nga seguridad para sa Sinulog Festival 2025 sa Police Regional Office(PRO)-7.
Si PRO-7 Regional Director Brigadier General Redrico Maranan, kinsa maoy nangulo sa Task Force Fiesta Señor midayeg sa tanang nalambigit sa pagdumala sa security ug emergency response alang sa kapistahan.
Ang kalihukan nahitabo nga wala'y natala nga security incidents sa Central Visayas nga nagpakita sa kaepektibo sa measures nga gipatuman.
Hinoon, dunay minor violations sama sa pagsupak sa ordinansa may labot sa pag-inom ug pagpanigarilyo sa pampublikong lugar, paglakaw-lakaw nga wala nagsul-ob og sinina, public urination ug littering ingon man paglapas sa curfew ug traffic laws.
Mahitungod usab sa eight focus crime atol sa Sinulog period nikunhod og 52.89 percent o 64 incidents itandi sa niaging tuig.
Niadtong Enero 11 hangtud 21, 2024 anaa sa 121 ka insidente ang na report apan karong tuiga gikan sa Enero 9 hangtod sa 19 naa lang sa 57 ka incidents lang nga gikonsiderar sa kapolisan nga resulta sa proactive measures nga ilang gipatuman.
Sa Sinulog Grand Parade, ang PRO-7 ni-deploy og 8,404 security personnel apil na niini ang PNP, AFP, BFP, NAVFORCEN, force multipliers, support gikan sa nagkalain-laing organizations, mobility resources, ug ubang security components. (BANAT NEWS)