Sunog sa oil storage nagbilin og P4 milyones nga danyos

CEBU, Philippines — Dul-an sa kwatro milyones ka pesos ang gibiling danyos sa sunog nga niulbo sa sunog sa giingon nga oil storage diha sa Jose L. Briones Street, sa Barangay Carreta sa Dakbayan sa Sugbo, Sabado sa gabii.

Ang sunog naglambigit kini ug storage ug residential area nga giingong gipanag-iya sa usa ka giila lang sa pangalan nga “Yenyen” ug giokupar sa laing tawo nga giila lang sab sa alyas nga RJ.

Ang alarma sa sunog nadawat alas 9:11 sa gabii, giisa dayon kini hangtud sa 4th alarm tungod naglisod ang kabomberohan pagpawong niini. Alas 10:41 uno na sa gabii kini hingpit nga nakontrolar ug napawong pasado alas 11 na sa gabii.

Walay gikataho nga nakalas sa hitabo apan usa ka Rustico Casas Jr., ang nakaangkon og 2nd degree burn.  Napulo ka mga estraktura ang apektado diin upat ang nakan-an sa kalayo ug unom ang hingpit nga naugdaw nga nidanyos ngadto sa P3,885,000.00.

Niabot ngadto sa 10 ka pamilya o 48 ka individuals ang apektado sa maong sunog.

Padayon pa ang gihimo karon nga imbestigasyon sa kabomberohan nga gipangulohan ni FO3 Fulbert Navarro kung unsay hinungdan sa pag ulbo sa maong sunog.

Usa sa gisusi niini kun kinsa ang tagiya sa maong oil storage ug kun duna ba kini permit gikan sa Department of Energy, Bureau of Fire Protection ug sa siyudad nga magpundo og petrolyo sa maong lugar sanglit peligroso kini nga produkto. — /IBM (BANAT NEWS)