CEBU, Philippines — Giisyuhan na sa Cebu City Government og notice of termination ang SBD builders nga mao ang kontraktor sa Reinforced Deck Girder Bridge sa Sitio Candarong hangtod sa Tanay Road, Barangay Pulangbato.
Kini maoy gipahibawo ni Cebu City Mayor Raymond Alvin Garcia niadtong Biyernes. Matud niya, ang notice of termination maghatag ug pito ka adlaw sa SBD Builders aron maka sumiter sa ilang explanation. Apan kun dili sila matagbaw sa ihatag nga katin-awan mo-isyu na siya og final termination sa kontrata.
"Ato gyud ning gipapaspas kay naluoy gyud ta sa kahimtang sa atong kaigsuonan, not only in Barangay Pulangbato but the entire mountain barangays kay agianan man na sa atong kabukiran sa dakbayan sa Sugbo," suma pa ni Garcia.
Hinuon si Garcia miingon nga bisan pa sa termination action, ang contractor mabayaran gihapon sa ilang nasugdan nga trabaho ug kini madeterminar pinaagi sa himoong joint inspection.
Kahinumduman ang mga opisyales sa Barangay Pulangbato miawhag sa Cebu City Government nga i terminate ang kontrata sa SBD Builders alang sa pagtrabaho sa taytayan diha sa Pulangbato.
Kini pinaagi sa resolusyon nga ilang gipasar niadtong October 7, 2024, nga napadangat sa konseho sa siyudad sa Sugbo, gani nanawagan sila alang sa pagdeklarar og state of emergency sa barangay.
Gumikan sa kalangay sa pagtrabaho sa maong taytayan ang mga sakyanan napugos sa pag-agi sa mga delekado nga karsada og gikabalak-an sa mga barangay officials tungod kay delikado kini alang sa mga residente sa barangay Pulangbato.
Bisan pa sa pipili ka mga pangutana bahin sa integridad sa SBD Builders, si Garcia niingon nga wala pa siya makadesisyon kung irekomendar ba niya nga i-blacklist sila sa umaabot nga mga proyekto sa kagamhanan sa dakbayan, ug midugang nga kinahanglan niyang hulaton ang desisyon sa Bids and Awards Committee (BAC).
Ang SBD Builders mao usab ang kontraktor sa rubberized track oval sa Cebu City Sports Center, nga nag-atubang usab og pipila ka mga concerns kalabot sa ilang integrity tungod sa pagkalangay sa construction. Matod ni Garcia, gikinahanglan ang assessment gikan sa independent third-party nga contractor. — /MEL (BANAT NEWS)