P5.54 milyones ihatag sa probinsiya sa Sugbo sa Compostela

CEBU, Philippines — Makadawat og P5.54 million ang lungsod sa Compostela gikan sa Probinsya sa Sugbo.

Kini ang gisaad ni gobernador Gwendolyn Garcia atol sa iyang pagtambong sa Kumbira Festival sa maong lungsod niadtong Enero 17.

Ang maong tabang pinansyal alang sa socio-cultural initiatives sa lungsod diin ang unom ka contingents nga niapil sa grand ritual showdown sa maong kalihokan makadawat og tag P200,000 gikan sa Kapitolyo aron mabawi ang nagasto niini.

Ang LGU makadawat usab og P4 million alang sa socio-cultural nga programa.

Ang top-three nga nakadaog nga contingent nakadawat usab og special awards gikan sa personal nga pondo sa gobernador.

Ang champion nga mao ang Pundok sa Nagkahiusang Pamilyang Poblacion, adunay P60,000 gikan kang Garcia; ang Mahudyakang Kabatan-onang Mananayaw sa Kabukiran nga maoy second place nakadawat og P40,000 samtang ang Pundok Mananayaw sa Sakdapantamu adunay P35,000 gikan sa kang Garcia.

Ang tulo ka contingents nga wala kadaog adunay tag P15,000 gikan sa gobernador.

Samtang, ang nakadaog sab nga best in costume ug street dancing sa maong festival mao ang Pundok sa Nagkahiusang Pamilyang Poblacion; ang Best Intro Video ang Kulturang Cogodiangan.

Ang Kumbira Festival maoy nihulip sa Queseo Festival sa lungsod diin maoy gi-feature sa ika-106 nga founding anniversary celebration sa lungsod. — /MEL (BANAT NEWS)