DHSUD nipasalig humanon ang 4,702 ka housing units karong tuiga

CEBU, Philippines — Nipasalig ang Department of Human Settlements and Urban Development (DHSUD) nga kompletohon sa Disyembre ning tuiga ang nahabilin nga 4,702 ka housing units ubos sa Yolanda Permanent Housing Project (YPHP).

Sumala sa Philippine Information Agency si DHSUD Secretary Jose Rizalino Acuzar miingon nga ang National Housing Authority (NHA), attached agency sa DHSUD, nipasalig nga humanon kining mga nahabilin nga permanent housing projects alang sa mga biktima sa Super Typhoon Yolanda.

Sa pagkakaron, ang NHA nakakompleto na ug 53,917 ka units gikan sa kinatibuk-ang 58,619 ka kinahanglanon nga housing units ubos sa YPHP. Sa mga nahuman nga units, niabot na sa 45,454 ang giokupar na sa mga benepisyaryo.

Niadtong Enero 17, gi-turnover ang 3,517 ka mga housing units sa Burauen, Leyte nga gipangulohan ni Presidente Marcos Jr. uban ni House Speaker Martin Romualdez.

Atol sa ceremonial turnover, giawhag sa Presidente ang mga housing agency nga magtukod og climate-resilient nga mga balay aron masiguro nga matag unit makasugakod sa bagyo ug uban pang natural nga kalamidad.

“Nagpatayo tayo ng mga bahay na matibay at kayang siguruhing ligtas ang inyong pamilya sa gitna ng mga hamon ng kalikasan. Iyan ay dahil sa disaster resilient housing design na masusing isinagawa ng National Housing Authority. Ibig pong sabihin nito, ang ating mga pabahay ay kaya nang labanan ang malakas na hangin at lindol,” dugang niya.

Ang maong housing units nahimutang sa Cool Spring Residences, Riverside Community Residences, Mont Eagle Ville Subdivision, Coconut Grove Village, Dagami Town Ville ug Pastrana Ville, tanan sa Leyte; Marabut Ville Sites 1 ug 2 sa Samar; ug ang Culaba Housing Project sa Biliran.

Ang mga kuwalipikadong benepisyaryo sa YPHP nakadawat sa mga housing units isip grant, nga walay bayad, human ma-displaced tungod sa Bagyong "Yolanda" niadtong Nobiyembre 2013 ug nagpuyo sa mga hazard-prone areas. — /MEL (BANAT NEWS)