Wanted nga nalambigit sa pagpanulis nasikop

CEBU, Philippines —  Usa ka wanted person nga giingong nalambigit sa pagpanulis sa duha ka jewelry shops sa Barangay Ermita, siyudad sa Sugbo sa miaging tuig nadakpan sa kapolisan sa Probinsiya sa Sugbo pinasikad sa warrant of arrest.

Ang suspetsado mao si alyas Vio ug nabutang isip Top 3 Most Wanted Person Regional Level ug nalista sab kini isip Top 3 Provincial ug Municipal Level Most Wanted Person.

Nasikop kini didto sa sitio Nangkaan, Barangay Perrelos, Dakbayan sa Carcar niadtong Enero 17, 2025.

Si alyas Vio usa ka welder ug gidakop gumikan sa pagkalambigit sa nahitabong tulis niadtong Agosto 8, 2024 sa Macy’s and Gold Chain sa Barangay Ermita, Cebu City.

Ang pagkasikop niini subay na sa pag-issue og warrant of arrest ni Hon. Jennifer Karen A. Leyson, Presiding Judge sa Regional Trial Court Branch 23, Cebu City niadtong Enero 16, 2025 ug dunay girekomendar nga piyansa nga P100,000.

Usa ka joint operation ang gihimo sa Tracker Team ug Intelligence personnel sa Carcar City Police Station diin ang lead unit mao ang Police Station 5 sa Cebu City Police Office ug Regional Intelligence Unit-7 sa Cebu Provincial Intelligence Team. 

Si Police Colonel Jovito Atanacio, Acting Provincial Director sa Cebu Police Provincial Office midayeg sa mga sakop niini nga nihimo sa maong operasyon.

Ang suspetsado naa na sa kustodiya sa Carcar City Police Station ug itugyan unya kini sa korte. (BANAT NEWS)