Ex-convict sa kaso sa drugas gipusil patay

CEBU, Philippines — Namatay ang usa ka 47-anyos nga lalake human kini gipusil samtang nag-angkas og motorsiklo sa Sitio Lahing-Lahing, Barangay Mabolo, siyudad sa Sugbo, Biyernes sa kadlawon, Enero 17, 2025.

Ang biktima mao si Eugene Gabato Taripe, 47, nagpuyo sa Barangay Talamban ning siyudad.

Nagkanayon si Police Major Romeo Caacoy Jr., hepe sa Mabolo Police Station 4 Cebu City Police Office (CCPO) nga base sa pamahayag sa saksi nga ilang naestorya,  ang biktima sakay kini og motorsiklo kuyog sa iyahang amigo.

Pag-abot matod pa nila sa naasoy nga dapit dunay tawong niduol ug diretso kining gipusil.  Nakapadagan pa kini sa motorsiklo apan nasarasay gihapon kini sa unahan. Kalibre .45 nga armas ang matud pa ang gigamit sa mamumuno.

Sa pagkutlo ning maong balita gipangita pa sa kapulisan gipangita pa nila ang kauban sa biktima nga maoy nipahibalo sa Barangay Hall labot sa nahitabo.

"Possible (involvement sa crime) kay base sa mga circumstances timing man kaayo so naay knowledge ang gunman nga moagi gyud didto anang orasa ang maong biktima unya ang kaning biktima dili man na taga diha sa maong lugar," sigon ni Caacoy.

Nasuta sab sa kapolisan nga ang biktima nadakpan na sa Police Station 4 niadtong 2015 sa kasong kalambigitan sa illegal drugs ug paghupot og illegal nga armas.

Dayon pagka 2022 nadakpan sab kini sa Mambaling Police Station gumikan gihapon sa illegal drugs human kini nakuhaan og P1.4 milyon nga kantidad sa drugas ug dunay report nga nalambigit kini sa pagpanulis.

Kaso sa kalambigitan sa ilegal nga drugas ang anggulo nga gitan-aw sa kapulisan mahitungod sa maong pagpamusil. Romeo D. Marantal, IBM BANAT NEWS