Way vehicle passes, towing companies gi-deputized

CEBU, Philippines — Mga private towing company gi-deputized sa Cebu City Traffic Office batok sa mga magpataka og parking sa parade route sa Sinulog Grand Parade.

Sila maoy mobitad sa mga sakyanan nga makita diha sa rota sa parada tungod kay walay exemption nga gihatag ang siyudad para sa tanang mga pribadong sakyanan atol sa Sinulog 2025 ug sa Fiesta Senior, sumala pa ni Raquel Arce ang pangulo sa Cebu City Transportation Office.

Sumala pa ni Arce, higpit nga ipatuman ang No Parking sa mga dapit nga dili designated parking area.

Wala usay parking area nga itagana ang city government mao nga giawhag kadtong dili gyud mahimong dili magsakyanan nga mangita og parking areas sa mga pribadong establisamento.

Ang madakpan nga magpataka og parking multahan og P2,500 ug kung ang private towing ang makakuha lauman nga mas dako usab og bayranan.

Gipahibalo usab sa CCTO nga alas-2 palang sa kaadlawon sirad-an na ang mga karsada sa parade route ug tugotan lang kadtong adunay importanteng kalihukan sama sa mga sakyanan nga mohakot sa mga props ug ubang deliveries kabahin sa Sinulog apil ang media.

Sa alas-10 sa buntag wala na gayuy sakyanan nga paagion sanglit nakaplastada naman ang mga contingents ug wala usab silay gihatagan og vehicle passes, sumala pa ni Atty. Kent Jongoy, Assistant Department Head sa CCTO.  IBM BANAT NEWS