CEBU, Philippines — Patay ang usa ka 30-anyos nga babayeng buntis samtang angol ang kaipon niini sa dihang nabanggan og v-hire ang gisakyan nila nga motorsiklo sa National Highway sa Barangay Lagunde, Lungsod sa Oslob niadtong Huwebes sa buntag, Enero 16, 2025.
Ang namatay mao si Krystelle Joy Amaca, 30 anyos samtang ang kaipon niini nga naangol mao si Laurito Bolo, 41 anyos, pulos residente sa Purok Orchid, Barangay Lagunde sa maong Lungsod.
Samtang ang suspek mao si Alexes Tabes Mariveles, 28 anyos, nagpuyo sa Montserrat, Lungsod sa Pilar ug driver sa v-hire.
Sa imbestigasyon sa Oslob Police Station ang mga biktima nga sakay sa ilang motorsiklo nagsubay sa national highway kay paingon kini sa Oslob Birthing Center.
Ang v-hire sab nga gimaneho ni Mariveles nagsubay sab sa national highway. Apan pag-abot sa naasoy nga dapit giingong kalit niining nabanggaan ang duha nga miresulta nga sila natumba.
Gidala dayon sa Oslob District ospital ang mga biktima apans si Krystelle gideklarar nga dead-on-arrival human kini nakaangkon og grabeng kadaot sa lawas.
Nagtingkagol karon sa prisuhan ang driver sa v-hire ug gikatakda kining pasakaan og tukmang kaso. IBM BANAT NEWS